.................

..............................

التدوينة البيضاء .....عربية ايضا

التدوينة البيضاء اصبحت للاسف تقليدا سنويا للمدونات التونسية نظرا للحجب المتواصل الذي عانت ولا زالت تعاني منه المدونات التونسية؛ حجب يطال كل مدونة تتخطى الخط الأحمر المرسوم في اذهان "عمال" الرقابة ( و افضل هنا لفظة عامل رقابة على لفظة عون رقابة لاني لا أرى في مهمتهم هذه عونا او مصلحة تذكر)؛فضاء التدوين خلق ليكون مجالا للتعبير الحر نجح الشباب التونسي كغيره من الشباب العربي في السيطرة على تقنياته و خلق بذلك لنفسه فضاء موازيا للتعبير لم يعد مظطرا فيه للعبور عبر القنوات الاعلامية التقليدية؛ فبرزت بذلك لغة جديدة تعبر عن هموم الشباب و مشاكله و اصبحت لما تتميز به من عفوية و صدق تجلب جمهورا سئم اللغة الخشبية السائدة في الخطاب الاعلامي الرسمي؛ نجاح المدونات العربية ما كان ليمر دون عقاب في بلاد لا يسمح فيها بحرية الرأي الا في الرياضة و الفن؛ فكان الحجب المتواصل للمدونات و المواقع؛ بل وصل الأمر الى السجن و الاختطاف كما حصل مع مدونين في مصر و السعودية و المغرب؛ لذا ادعو هنا كل المدونات العربية الى مشاركتنا في هذه الحملة السلمية للتنديد بالحجب و المضايقات التي يتعرض لها المدونون في كل البلاد العربية؛ يمكنكم المشاركة في الحملة بوضع احدى شعارات الحملة و تسجيل تضامنكم معنا في مدونة ضد الحجب حتى نتمكن من احصاء عدد المشاركين و شكرا لكم مسبقا

انقر على لوقو لتحصل على الكود

اعملوا جمعية... او امشوا العبوا في دحدح

هيا قالك يا سيدي آش قولكم كان نعملوا جمعية؟؟ فكرة تظهر باهية من ناحية المبدأ؛ لكن زعمة تجي زعمة جمعية للمدونين؟؟؟ شكونهم ساعة المدونين؟؟ تي شطرهم ناس موش معروفين او ماعندهم حتى علاقة ببعضهم ولا حتى مصلحة مشتركة؛ هل يمكن انوا التدوين في حد ذاتوا يكون قاسم مشترك بين مجموعة من عباد باش تعمل جمعية؛ او من الناحية القانونية هل ممكن انوا الجمعية تضم ناس انونيم ولا هذوكم موش داخلين؟؟؟؟؟ او كان باش نتخالاو عليهم هاهو تولي الجمعية ما تمثل كان كعبات يتعدوا على الصوابع؟؟ او زيد انا شخصيا نعتقد انو اهم حاجة تميز مجال التدوين هو انوا مجال حر ما ايقيدو حتى شيء لا جمعية ولا قوانين نظام داخلي؛او زيد انا مانيش فاهم شنوة ممكن تقدم هل الجمعية لي انا بصفتي مدون؟؟ كي يحجبولي مدونتي مثلا كيما صار قبل و كيما صار مع برشة اوخيان؛ شنوة باش تعملنا هل الجمعية؟؟ باش تعطيني تعويض ههههه؟؟ ولا باش تصدر بيان احتجاج و تنديد؟؟؟ ولا زعمة باش ايولي عندنا ممثل قانوني ايدافع علينا؟؟ انا نتصور حتى الحالات هذي او مع الظروف الراهنة او التضييق على العمل الجمعياتي في بلادنا العزيزة فانوا هل الجمعية موش باش تعاونا على انا نحلوا مشاكلنا ؛ بالعكس باش تزيد اتضيق علينا بما انوا عمار او اصحابوا باش تولي عندهم جهة واضحة او ظاهرة ايوجهولها الدبوس متاعهم؛ اما توة هاهي البيعة مفرقة او داخلة بعضها كان طارت ايقص مدونة ولا زوز تعاود تتطلعو بادريسة اخرى؛ اما مع الجمعية باش تولي الادريسة واضحة او ساهل عليه ممارسة الضغط عليها؛ كان موش ممارسة حاجات اخرى؛ لذى انا نرى انو يبقى الوضع على ما عليه خير خاصة انو برهننا انو وسط هل الفوضى هذه الكل انجموا نتظموا او نعملوا حاجات مع بعضنا كيما ايام التدوينة البيضاء او غيرها؛ آخي ما سمعتوش بالفوضى الخلاقة هههه؟؟؟ هذي هي؟؟ انا خايف كان تكبر في روس الجماعة حكاية الجمعية هذي او ايخوضوها بالعياط او الحس او ايولي عمار يدورهالم حكاية انتماء؛ او تولي عاد مسكين فلان شدوه ؛ شبيه خوانجي؟؟ لا تدوينجي معنها مدون منتمي؛ ما تستغربوا شيء في هالبلاد راهو عادي ماتضحكوش؛ لذا انا نرى انو قوة المدونين هو انهم في الفرتيال او مفرقين صعيب تنجم تضربهم؛ على خاطر الناس الكل مدونين؛ او انا نتمنى انو ظاهرة التدوين تنتشر أكثر او تولي الناس الكل تكتب؛ الناس الكل تعبر؛ برا وقتها آش كون باش تشد؛ اما كي تعمللهم جمعية تحصرهم؛ هذا اذا كان نجحت الفكرة اصلا؛ لانو كيما قلت المبدأ هو انو الناس الكل اتدون؛ ما يغركمشي العدد اللي مازال ضعيف توة؛ او توة بالله مدون عمرو 7 سنين باش تحطو ما استاذ جامعي في نفس الجمعية؛ او زيد شنوة اللي يلزمني انا بقرارات او افكار الجمعية كان ما عجبتنيش؟؟ ولا باش ايولي كل واحد يعمل على زي راسو او هكاكة تولي الجمعية صورية او ما عندها حتى معنى؛ لذا نقوللكم سيب علينا من هل الحكاية لا يولوا ايقولونا كيما كان جمهور المكشخة ايقول قبل "اعملوا جمعية...او امشوا العبوا في دحدح

هذيكا بلادي .....تونونيمس

كانك علماني انت فاسد او كان ما ردوكش كافر؛ كان تصلي تولي خوانجي او كان ماراصتلكشي في الفينقة؛ كانك خدام يكرهوك؛ شبيك آخي تخدم في رزق بوك؟؟ كانك كركار؛ آه مهف يعمل ضربتين او ايجي في قعر الحانوت؛ مرتاح او مريحنا؛ كانك تبزنس نسواني او مخك فارغ؛ كانك مستكفي بروحك معقد او ماكش نرمال؛ ؛ كان قريت على روحك ايصبولك الماء في ركايبك؛ خريت فيه بالقراية؟ هات آش عندك؟؟ آش تسوى؟؟ كان ماقريتش بهيم مستك طالع لبوك ولا لامك؛ كان قرّيت تولي جرد استاذ؛ كان ماقريتش تضرب البطالة حتى لن ادورها سرقة او براكاجات في لخر ايدخلوك الحبس؛ كان هجيت تولي من جماعة شي نو يغزرولك على جنب؛ كان قعدت يحقروك على خاطرك من وراء البلايك؛ كان كذبت ايصفقولك؛ كان قلت الحق ايصرفقوك؛ عاد العالم هذا الكل جاووه جماعة توة او شمروا على ايديهم او حبوا يكتبوا؛ او كتبوا؛ او زادوا كتبوا؛ اوزادوا كتبوا؛ مساكن ما يعرفوش اللي ممنوع الكتابة في بلادي ها الدونيييين؛ علاش تكتبوا؟؟؟ العلم الكل عندنا او موجود في زوز كتب؛ كتاب موجود في كل دار؛ او كتاب مكتوب على كل دار؛ لذا ماتتفجعوش او ما تتقلقوش لا من انونيم ولا غيرو؛ على خاطر هاكم شفتو؛ البلاد كلها انونيم؛ تونونيمس

الى السيد وزير الصحة؛ الكنام تسرقني

سيدي الوزير؛
لقد قمت كأيها الناس بالتسجيل في الكنام منذ اشهر؛ ولقد اخترت منظومة القطاع الخاص؛ فما راعني الا انه تم الحاقي "عنوة" بمنظومة القطاع العام؛ و لكن وبما انني كنت متابعا لفوضى الكنام في الصحافة المكتوبة و الالكترونية؛ لم افاجأ بالأمر وقصدت اليوم ادارة الكنام بولاية نابل من اجل تصحيح الامور؛ لكن المسؤول هناك رفض و طلب مني الرجوع في سبتمبر القادم؟؟؟؟؟؟ مما يعني ان الكنام سيأخذ مني مالي عنوة و بدون حق الى موفى شهر سبتمبر القادم؟؟؟؟ ماذا يسمي القانون التونسي اخذ مال الناس عنوة و بدون رضاهم؟؟؟ لماذا يجب عليّ دفع مال من اجل شيء لا اريد الاشتراك فيه؟؟؟؛ هل هذه هي دولة القانون و المِؤسسات؟؟؟؟ ثم اي قانون هذاالذي لا يسمح لزوجتي بالتمتع بنفس النظام الذي يتمتع به زوجها فقط لانها طالبة؟؟؟ طالبت من الموظف هناك مدي برد كتابي؛ فما كان منه الا اخبرني انه بامكاني احضار عدل منفذ ليشهد على كلامه؟؟؟ لن اقوم سيدي الوزير باحضار عدل منفذ و لكني سأقوم بارسال بريد الكتروني؛ تكون الادارة مطالبة بالرد عليه في 48 ساعة كما تنص عليه المعلقات في بهو كل الادارات التونسية؛ و في حالة عدم الاستجابة لطلبي فاني سألجأ الى القضاء من اجل استرداد حقوقي؛ اتمنى ان ان يصلك نصي هذا لتعرف بعض ما يجري في وزارتك و حتى يتمكن سيادتكم من اخذ التدابير اللازمة من اجل اصلاح الوضع.
آدم الصالحي
مواطن تونسي

تلفون من شباب العالم

بربي كي ما تعرفوش تكتبوا علاش الفضايح مع شباب العالم؛ هكة توة؟؟؟ ماهو على الاقل كلموهم بالتلفون ولا بالشات كي انتوما مازلتوا ما تعرفوش حتى تحطوا نقطة كي تكمل الجملة؛ صحيح احنا عندنا الماء مسيب على البطيخ اواو كل شيء محلول على بعضو؛ لا تحكم فينا لا نقطة لا نظام؛ ما عدا نقاط التفتيش و قواة النظام؛ اما مانا تفاهمنا مع القورة نوري وجه السوق؛ توة يارسول الله ما نجمتوش تجيبوا واحد يعرف اللي في نهاية الجملة لازم نعملوا نقطة او معبدها نكتبوا جملة ثانية؛ او هكاكا ديما يمشي؛ لا قالك احنا شباب توة تونس منفتحين على كل شيء او كذلك الجمل متاعنا؛ مالا ياسيدي نعلمكم اللي وقع سوء فهم للرسالة متاعكم او الدنية خاضت؛عاد شباب العالم بعد ما بعث بجواب لبيغ تراب بوي كلمني في التلفون؛ صوتهم في حالة او داخلين بعضهم؛ قالولي شكون جعل هذا او معتزونه؛ الانتربول قاللهم ممكن يكونوا ارهابيين ناويين يعملوا عصابة كيما القاعدة سموها الميثاق اللي هو مبني على الشرع الاسلامي كيما جماعة القاعدة؛ او هاهي الجملة اللي خلاتهم يفهموا هكة

شاركنا في الحوار بكثافة وتبادلنا الراى بكل صراحة وشفافية شرعنا

قالك الجماعة ناوين يعملوا قاعدة جديدة ولا شنية الحكاية متاعت شفافية الشرع هذي. هيا قلتلهم لا ما تخافوش موش هكاكة الجملة. راهم نساو نقطة او هكة اصل الجملة

شاركنا في الحوار بكثافة وتبادلنا الراى بكل صراحة وشفافية(نقطة) شرعنا في صياغة ميثاقنا الشباب الوطني الذى نبرز فيه رؤيتنا لتونس والتزامنا من اجلها.؛

او زيد قالولي شكون جعل هذا؟؟
لقد فتح لنا الرئيس زين العابدين بن علي فرصا واسعة امام الشباب للحوار وللمشاركة جعل

قلتلهم ممكن يقصدو قناة جديدة كيما حنبعل؟؟ شكون يعرف
خلي عاد من الجملة هذي

ان مستقبل العالم بين ايدى الشباب . الاهداف الكبرى للامم المتحدة وتحديات العالم تحتاج الى يقظة الشباب والى حماسه

الجماعة ما فهموش آش مدخل حماس في الحكاية؛ قالولي آخي انتوما زادة عندكم اسرائيل؟؟؟ و الله ما عرفتش آش نقول؛ قلتلهم لا راهو الجماعة ايفدلكوا
او كل شيء لقيتلو تفسير كان معتزونه هذا ما عرفتوش شكون؟؟؟ قالولي شكونوا هذا؟ ارهابي؟ قايد جديد؟؟ عملت روحي ما سمعتوش؛ او هاكم اقروا بالله او نوروني كان تعرفوه

اننا معتزونه بموقعنا في الحياة العامة اننا متفائلون لمستقبل تونس

او زيد قالولي شنوة معناها موقعنا في الحياة العامة؛ قلتلهم معناها مع العامة في الشارع الشباب الكل حاط الحطة او شايخ؛ اما في الحياة الخاصة؛ في امورنا مع جيوبنا مع نسانا مع ارواحنا ...او بعد قلت هيا زايد توة نفسد فيها؛ خلينا في الحياة العامة
فيبالي سلكتها آخي زاد قلي بالله زيد فسرلي هذي رانا مافهمناهاش مليح

حتى يواصل الشباب اخذ مواقعه في الحياة العامة ويتحمل شرف القيادة في المسار الوطني

ماهو احنا في تونس نظمنا المؤتمر العالمي للمعلومات؛ او من حينها ولا كل شاب عندو موقع؛ عاد تولي تمشي مثلا في المغازة العامة؛ اللي هي جزء من الحياة العامة حتى يهبط عليك واحد ايقلك شد هاهوالموقع متاعك؛ او ياويلك كان خذيت موقع وحدك من غير ما يعطهولك المسهولين؛ لازمك تستنى مسهول يعطهولك باش تنجم تولي عندك موقع؛ او هذي حاجة بديهية او تابعة النظام؛ او اهوكة ساعات تزيد تعطي حويجة باش يعطوك موقع باهي؛ او وقت اللي يولي عندك موقع تولي عندك شرف المشاركة في السباق في المسار الوطني؛ او الجايزة متاع السباق هذا تفرق انت او المشاركة متاعك؛ ثمة اللي يصور خبزة؛ ثمة اللي صور ربع؛ او الأغلبية ايشاركوا من اجل المشاركة؛ او باش الجماعة اللي يجروا ياسر او ديما رابحين المسار الوطني ايحسوا بنشوة الربح كي يشوفوالخرين
ما هزوا شيء؛ هيا سيدي كيما تقولوا انتوما المنافسة الحرة
اننا ندعو شباب العالم الى تحمل دوره في تنمية الامم والاسهام في بناء مستقبل الانسانية الذى لا يكون الا مشتركا ومتضامنا

اما الجملة هذي سامحني راني مافهمتهاش؛ ما نعرفشي كيفاش مستقبل الانسانية لازموا يكون متضامن؛ والله الناس تكون متضامنة ممكن؛ اما هذا مستقبل متضامن؛ عمري ما سمعت؛ اللهم الا اذا كان مستقبل قابس باش يتضامن مع الستاد او يعملوا جمعية واحدة؛ او هذي ماتصير كان في الجنة؛ نشوفوكم فيها انشالله بجاه هل الشهر الفضيل
اما الفقرة هذي ما سألنيش عليها فسرتهالو وحدي على خاطر عرفتها صعيبة على مخو

اننا مقتنعون ان للشباب دور كبير في رفع هذا التحدى فوعي الشباب بخطورة هذا التحدى واستخدام قدراته على افضل وجه يساعد الانسانية على تجنب الانعكاسات الخطيرة للتدهور البيئي

ياسيدي لهنا ايحبوا ايقولونا ما عادش تبولوا على الحيوط راهو موش باهي للبيئة؛ هذيكة هيا لحكاية
اما بالنسبة للتكرار الزايد او ركاكة الاسلوب؛ ماتلوموش رانا صايمين؛ هيا شاهية طيبة

موجة التدين تضر بأطباء النساء بتونس

يبدو ان ظاهرة التحجب لدى التونسيات و التدين عند الرجال و الشباب في تونس كان له تأثير سلبي على أطباء النساء الذكور( جيناقولوق)؛ حيث فقد العديد منهم عددا كبيرا من مرضاهم نتيجة تحجبهن او رفض الاخوة او الزوج ان تزور المرأة طبيبا ذكرا بدعوى ان ذلك فيه تعري للمرأة امام رجل غريب؟؟؟ في مقابل ذلك اصبح هناك اقبال كبير على الطبيبات؛ حيث اصبحت عياداتهن تعج بالنساء المحجبات و عادة ما يكون المشهد مرفوقا بلحية اواثنين ؛ تحس في هذه العيادات كأنك في أفغانستان او السعودية؛ الخطير قي هذا الأمر هو الايدولوجيا التي يحاول المتدينون الجدد بثها في المجتمع؛ حيث اصبحت المرأة التي تعالج عند طبيب ذكر تجد حرجا في ذكر ذلك بل و تلاقي استهجانا حتى من طرف الكثير من النسوة؛ المواقف الاكثر اعتدالا تقول بأنه ليس هناك من داع لزيارة طبيب مادامت هناك طبيبة؟؟؟ كما ان الكثير من الرجال لم يعد بامكانهم حنى مجرد الاشارة الى ان زوجته تزور طبيبا ذكرا خوفا من ردة فعل "الفحول" المتأسلمين الجدد. يبدو ان المجتمع التونسي اصبح يدور في دائرة مفرغة لم يعد يفرق فيها بين المنطق و اللامنطق؛ نعلم جميعا اننا كنا نتقدم ببطىء شديد وهو ما جعلنا لا نستطيع مواكبة تطور الدول المتقدمة؛ لكن يبدو اننا قد مللنا من التقدم البطيء و فضلنا عليه التأخر السريع و الرجوع الى الخلف بسرعة مذهلة؛ محطمين كل مابنيناه من قيم و اسس لمشروع مجتمع متقدم كان على الأقل حلما لكنه تحول الى كابوس
يمكنك الادلاء برأيك بالمشاركة في التصويت يسار الصفحة

عمار رجع الفايسبوك...او قال للناقد نعنبوك

هيا قالك خوكم عمار مسكين هبطت عليه الدامة من فوق او قالولو يا بهيم كيفاش اتسكر الفايسبوك او للّتك كونداليزا رايس جايا لتونس؛ تحب تعملنا شوهة؟؟؟ كي تجي كونداليزا باش تحل الكونت متاعها في الفايس بوك او تلقاه مسكر؛ ماهو توة تسكر علينا اللعب او كان ماراصتلناش في عقوبات اقتصادية؛ قالك يعملوهاالامريكان هاذهم ايعدو كل شيء كان حكاية التسكير؛ ايحبو اللعب ديما محلول؛ عاد عمار مسكين شويا او لا راصاتلو في قوانتنامو او هو ماشي في بالو يخدم في خدمتو؛ آشبيك راهو ايحب ايسكر على كونداليزا او ماندراك؛ هيا عاد هزوه سخسخوه او مسحو به القاعة؛ رجع منرفز اش باش يعمل آش باش يعمل؛ ولا فش غلو في هاك اللي عامل فيها ناقد او لاخر قالك مشاغب؛ هذوكم قلالة او سامحوني في الكلمة يخراو فيه؛ او من هنا فصاعدا وين باش يتغشش باش ايفش غلو في المدونين
هيا شاهية طيبة

فيكسي.....فيكسي البهامة....فيكسي الاستعمار

ليس غريبا ا ان تختار مؤسسة تكنولوجيا حديثة كمؤسسة اتصالات تونس اشهارا تاريخيا للترويج لخدماتها؛ لانها بكل بساطة مازالت تعيش في العهد الروماني ولا علاقة لها بالقرن 21؛ خدمتها الجديدة "فيكسي" و التي تعني بالدارجة التونسية "ثبّت" هي بالفعل تثبيت للتخلف و وصورة واضحة لتخلف هذه المؤسسة التي تدعي انها وطنية و هي لا تملك صفحة واب بالعربية؟؟؟؛ صفحة مكتوب عليها "بصدد الانجاز" بينما فضلت ان تنجز الصفحة الفرنسية لتذكرنا كعادة اغلب مؤسساتنا "الوطنية" باننا دولة متخلفة كانت ويبدو انها في نظرها لازالت تحت الحماية الفرنسية؟؟؟؟؟؟؟ منذ ان اشتركت في هذه الخدمة و انا اعاني الامرّين و ارتابني احساس باني اطلب صدقة من هذه المؤسسة و لست حريفا؛ ذهبت لاستخلاص الفاتورة متاخرا بايام قليلة؛ دفعت المعلوم و لكن ما راعني بعد ايام الا انهم قطعوا عني الهاتف و الانترنات؛ ذهبت لاستفسر الامر مبديا استغرابي نظرا لاني قمت باستخلاص الفاتورة؛ فما كان من السيدة الفاضلة بالوكالة الا ان اخبرتني بان امر القطع يصدر مباشرة اثر عدم الاستخلاص بيوم او يومين؟؟؟؟ و يبدو انه قرار لا رجعة فيه؟؟؟ و يجب علي ان اعود مرة ثانية لاخبرهم اني قمت باستخلاص الفاتو رة بعد صدور هذا القرار الذي كأنه يصدر من جهة منفصلة عن وكالة تونس للاتصالات؟؟؟؟؟ أليس هناك تنسيق داخل المؤسسة؟؟؟ اليس هناك نظام اعلامية يسمح بتنظيم الامور بينكم؟؟؟؟ ماذا يعني ان قرار القطع لا يتم الغاؤه مادمت قد دفعت؟؟؟؟؟ لماذا يجب ان اعود مرة ثانية و انتظر حوالي ساعة لاخبركم و نحن في عصر التكنولوجيا باني قد قمت باستخلاص الفاتورة ورجاء اسمحوا لي باستعمال الهاتف؟؟؟؟؟؟ ثم هل يعقل ان تصدروا قرارا في القطع اذا تأخرت اسبوعا عن الدفع؟؟؟ هل انا بصدد طلب صدقة من سيادتكم؟؟؟ اليس لديكم مفهوم الحريف هو الملك؟؟؟ ام لانكم تحتكرون السوق فانكم تسمحون لانفسكم بانتهاج سياسة استعمارية و تحولوننا من حرفاء الى عبيد؟؟؟ هذه المرة اردت ان استبق الامور حتى اتجنب قطع الخدمة مرة اخرى؛ ذهبت الى مركز البريد و اخبرتها اني اريد ان اشحن رصيد هاتفي الفيكسي؛ طلبت مني الرقم و مبلغ 30 دينارا؛ قلت في نفسي "هذي مشكلة او ارتحنا منها"؛ لكن ماراعني الا ان الرصيد بقي فارغا او انه يجب علي ان اشحنه مرة اخرى عن طريق بطاقات الشحن لأن الشحن في مركز البريد هو شحن لاستهلاك و ليس للفيكسي؟؟؟؟؟؟؟؟؟؟؟ هل هذا معقول؟؟؟ يعني انه يجب علي الآن ان ادفع مرة اخرى و انتظر قطع الخدمة كالعادة ثم اذهب من جديد الى الوكالة و اترجّاهم ان يرجعوا لي الخدمة؟؟؟؟؟؟؟؟؟؟ و الله لو تأتي اسرائيل تليكوم الى تونس لاشتركن فيها وانا ضميري مرتاح.

المنشطة هدى بن عمر تقدم برنامج لرتيستو و هي تردي قميصا مكتوب عليه MAKE ME SCREAM

كانت المنشطة هدى بن عمر في حلقة لرتيستو التي استدعت فيها الشادلي الحاجي و التي اعيد بثها يوم الاحد 24 اوت ترتدي قميصا مكتوب عليه بالانقليزية
MAKE ME SCREAM
فقط اود ان اذكر الاخت هدى بان الشعب التونسي يفهم الانقليزية؛ كما ارجو من السيد المحترم صاحب القناة؛ خاصة و انه ينوي بعث قناة دينية ان يفسر لنا مالمقصود من ذلك بالضبط بما انه رئيسها المباشر

قناة حنبعل الفردوس....كانت تشخر...زادت بف

ايا خوكم العربي نصرة بعد ما فددنا بالبرامج الخشينة متاع قناتو الهايلة حنبغل؛ او بعد ما اتحفنا بقناة حنبعل الشرق او مسلسالاتها الماسطة؛ قرر يزيد ايشرق شوية؛ او يدخل في الفريق متاع القنوات الخليجية او يعملنا قناة دينية؛ مالا علاش اسمو نصيرة هو؛ ماهو علا خاطرو نصير الاسلام و الرسول؛ مالا كيفاش؛ او هكاكا يكون المشهد متاع التدين الزائف الي ولا ظاهرة في المجتمع التونسي اكتمل؛ كان ناقصنا الاعلام الديني؛ هاهو جاكم؛ او قولوا عاد تونس خايبة او ماهيش عاطية قيمة للدين؛ آشنية الصحافة هي ؟؟ ماهي كورة او مسلسلات او فنانين او شوية دين؛ الجمهور عايز كده كيما يقولو؛ او يظهرلي العربي نصيرة عجبتو التجربة المضحكة الاقرب الى الكاريكاتورية للبرامج الدينية متاعو على قناة حنبعل فقرر باش يزيد يتحفنا بقناة كاملة في الموضوع.
توة زعمة آش باش تقدمنا هالقناة الخشينة؟ اسمها يدل على انو اللي باش يتفرج عليها باش يدخل الجنة طول؛ باش ايقصلو خوكم العربي تسكرة في الدرجة الاولى.
انا باش نحاول نتصور آش تقدم القناة هذي "للمؤمن" التونسي لانو مانتصورش انو خطابها باش يخرج عن الخطاب الرسمي المسموح به في تونس؛ يا سيدي او بعد ما تعود "المؤمن" التونسي على الخطاب السلفي متاع قنوات الخليج اللي ايجيبولو فيه "عالم" لحيتو ماخذة شطر الكاميرا؛ او اذا كلم مرا في التلفون ايسكر عيونو غضا للنظر؛ ما نتصورش كان حنبعل باش تكون خير من اختها قناة شبعة او باش تجيبنا مرا عريانة(في نظر المؤمنين المتابعين لهذه القنوات) تتكلم بعربية ركيكة و تحدثنا عن قيمة المرأة في الاسلام و كيف ان الدولة في تونس قد حررت المرأة اتباعا لقيم الاسلام السمحة(ما هو بورقيبة كان متدين ياسر هههه) او هذاكا علاش منعنا تعدد الزوجات مثلا؛ ولا ايجيبولنا واحد شايب ايقولننا راهو البروموسبور حلال. الخطاب الديني التونسي فارغ او بعيد عن الواقع؛ او زيد توة باش تولي الفضايح في التلفزة على عينك ياتاجر؛ او برا آش باش ايسلكها مع شبعة الروس المربطة في الشرق؛ باش تولي الحكومة تسلك فيها كيما مع فازة منع الحجاب؛ او اذا شدت بعضها ياسر تو ايقولو الاعلام مستقل في تونس او احنا خاطينا هههههه.توة ايجو لناس تعودت بمشهد اعلامي ديني سلفي؛ او ايجيبولهم واحد ايقوللهم راهو الحجاب موش ممنوع اما راهو المساك اللي ايشدو بيه المحرمة هو الممنوع على خاطر موش من تقاليدنا؟؟؟؟ او ايعدولك امام جمعة يتحدث عن قدسية العمل و قيمتو في الاسلام او دور الدولة او المسهولين حفظهم الله في توفير فرص العمل؛ او متناسي اللي شطر الناس اللي قدامو جايين ايصلوا باش يدعوا دعيوة لربي ثماش ما ينوب عليهم ربي بخديمة ياكلوا بيها الخبز؛ بالعربي يا سي العربي "المؤمن" التونسي ما عندوش ثقة في الخطاب الديني التونسي على خاطرو بعيد على الواقع او زيد جاي من جهة ابعد ما تكون عن الدين او فيه من الكذب ما يدخل للنار ههههه؛ بلاد ضارب فيها الفساد حتى النخاع او تحب الناس تسمعك؟؟؟؟ انت عجزت باش تعمل برنامج حواري واحد ناجح في قناة حنبعل؛ آش مدخلك في الدين باش اضحك على روحك الناس.توة بالله قولولي كيفاش اشهار حنبعل الفردوس ايجي بعدو اشهار لمسلسل مكسيكي فيه النساء تقريبا ما لابسين شيء؟؟؟؟ آخي تسخايلوا الناس بهايم؟؟؟ ولا هذاكا الاسلام الجديد متاع حنبعل؟؟؟ على كل حال انا يظهرلي باش نشيخوا بالضحك في هالقناة او امثالها في المستقبل؛ كيما شبعت الضحك توة في القنوات الشرقية او هذاكا علاش انا نقترح نعملو بودورو ديني يهتم بالجماعة هاذم خلي نضحكو شوي؛ ولو انو شيء ايبكي؛ اما هاني دازها بضحكة او لعبة؛ هيا انستم باش نمشي نشد قارد للهلال من توة قالك ممكن يهرب السنا ما يطلعشي على خاطرو حشام او ايفد كي يلقى الناس الناس الكل هازة روسها تعس عليه؛ رغم اللي هو قاللهم بالمسبق وقتاش باش ايشرف بحذاهم؛ اما آش تحب تعمل البهامة ديما اتبع فينا.

عمار تقوات عليه الكريز

خونا عمار تقوات عليه الكريز او دخل فيها حمرا كحلة او زاد قص مدونة ضد الحجب؛ انا نحب انبه الوخيان في الوكالة باش اهزو خونا عمار فيسع للبيطري باش ايزرقلو سينون راهو باش ايقص الانترنات كلها في تونس او تراصيلهم بطالة ماعادش باش يلقاو ما ايقصو؛انهضو ارواحكم يا جماعة قبل ياكلكم المقص.

يحدثوننا عن ضرورة فصل الدين عن الدولة فلماذا تصر الدولة على الالتصاق بالدين؟؟؟

لا يخفى على أحد في تونس منع الحكومة لكل حزب تفوح منه رائحة الدين من قريب او بعيد بدعوى ان الدولة المعاصرة هي دولة علمانية اوعلى الاقل لا تبنى على اسس دينية ؛ كلام جميل يدل على توجه علماني للدولة التونسية و حرصها على القطع مع الدولة الدينية و ما يمكن ان تشكله من خطر على بنية المجتمع المدني المعاصر؛ و لكننا نلاحظ في المقابل التصاق الدولة بالدين و حرصها على التحكم في المؤسسة الدينية عن طريق وزارة الشؤون الدينية؛ فهي التي تعين أئمة الجوامع؛ سواء ائمة الخمس او ائمة الجمعة؛ و امام الجمعة عادة ما يكون مناصرا للحزب الحاكم؛ و يكفي ان تستمع الى خطبة الجمعة حتى تتبين مدى اختراق الدولة للمؤسسة الدينية؛ مواضيع خطبة الجمعة تملى من طرف الوزارة الى درجة انه بامكانك ان تتوقع الموضوع اذا كان في ذلك الاسبوع عيد وطني او قرارات وزارية جديدة؛ فمن العادي ان تستمع الى انجازات الدولة في مقاومة التصحر و مجهوداتها في توسيع المساحات الخضراء اذا كانت الخطبة تتوافق مع عيد الشجرة؟؟؟؟
و يبدو ان الاتجاه الجديد للحكومة هو اقتحام مجال الاعلام باعطاء رخص لانشاء قنوات و اذاعات دينية و هو ما سيزيد من سيطرة الدولة على المشهد الديني رغم الاستقلالية الزائفة التي تحاول هذه القنوات ان تتسم بها بدعوى انها قنوات خاصة ولا تخضع لسيطرة الدولة. يبدو ان أحد أهم الاسباب التي دفعت الحكومة الى نهج هذا المنهج هو انتشار القنوات الدينية الشرقية التي تروج للفكر السلفي؛ لكن الم يكن من الاجدر انشاء قنوات تشجع على الحوار و تنمي الفكر التقدمي لدى الشاب التونسي و تقدم له بديلا حقيقيا للفكر السلفي المتخلف الذي تسعى القنوات الشرقية الى زرعه في عقول "المؤمنين".

التدوينة المحجوبة

أعلن جغرافيون فلسطينيون مقاطعتهم المؤتمر الـ31 للاتحاد الجغرافي الدولي الذي تستضيفه العاصمة التونسية، بعد غد الثلاثاء، ويستمر أربعة أيام، احتجاجا على مشاركة صهاينة فيه.

وقال مدير الجمعية الجغرافية الفلسطينية مسلم أبوالحلو، أن الجغرافيين الصهاينة يحملون رتبتين؛ الأولى عسكرية دموية، والثانية علمية جغرافية عنصرية.

وكان عدنان حيدر، رئيس جمعية الجغرافيين التونسيين، الذي يترأس أيضا اللجنة التنظيمية لهذا المؤتمر الذي ينعقد تحت شعار "لنبن معا مجالاتنا الترابية" بمشاركة 70 بلدا عربيا وأجنبيا ونحو ألف جغرافي، قد أكد في مؤتمر صحفي أمس أن عدداً من الجغرافيين الصهاينة سيشاركون في المؤتمر. ورفض حيدر الانتقادات التي وجهت لجمعيته لقبولها مشاركة صهاينة في هذا المؤتمر، زاعما أن ذلك جاء تماشيا مع اتفاقات دولية وقعت عليها بلاده.

ويشارك في المؤتمر جغرافيون من مصر والسعودية وسوريا ولبنان والمغرب والجزائر وليبيا والإمارات العربية المتحدة والكويت والأردن وعُمان واليمن، إلى جانب جغرافيين من دول أوروبية وآسيوية.

ولا تقيم تونس علاقات دبلوماسية رسمية مع الكيان الصهيوني، لكنها تستقبل باستمرار زوارا صهاينة، من ضمنهم مسؤولون في "اسرائيل" وعدد من كبار الحاخامات، يسافرون سنويا إلى موقع ديني يهودي في جزيرة جربة جنوب العاصمة التونسية، ويحظون باستقبال على أعلى المستويات وترحيب رسمي
http://annaqued.blogspot.com/

تدوينة حمراء ... لكي لا تستباح دماؤنا

أهالي قعفور يحتجون رسميا على مؤسسة التلفزة التونسية

تونس-وكالات
بعد الفرحة التي عمت أهالي قعفور السنة الماضية اثر اعلان مدير الاذاعة و التلفزة حينها عن فوز مدينتهم بمسابقة شعار التلفزة (اقرأ هنا)؛ وبعد التهاليل و الدعوات بطول العمر لمدير الاذاعة و التلفزة؛ ما راعهم الا ان التلفزة التونسية تتجاهلهم و تغير الشعار ليشمل كل البلاد التونسية و ذلك بتغيير لفظة

tunis
ب
tunisie
و لقد فسر مدير التلفزة الجديد قراره بانه غير مسؤول عن قرارات المدير السابق؛ الذي اصبح الآن مدير الاذاعة و ذلك بعد الفصل بين المؤسستين؛ ولقد ابدى الملاحظون استغرابهم سماح المسؤلين بوجود اشخاص تحمل افكار وطنية في مؤسسة اعلامية ضخمة بهذا الحجم؛ ما من شأنه ان يمثل خطرا على الاعلام في تونس الذي يشكو اصلا من عدة مشاكل. و لقد دعت منظمات المجتمع المدني الى ضرورة التدخل الفوري لوقف هذه السابقة في المجال الاعلامي لما يمكن ان ينجر عنها من مشاكل. و طبعا فلقد امتنعت مؤسسة التلفزة عن وضع الشعار الجديد في موقعها في الانترنت مما يعطي الانطباع عن امكانية التراجع في هذا القرار الذي يعد كما اشرنا سابقة خطيرة و خطوة غير محمودة العواقب

الصفاقسية سنة ولا شيعة؟؟؟

بعد الفضايخ متاع نهار الاحد و العار اللي شفناه في ستاد صفاقس؛ قعدنا نستناو في سي الزاحف باش ايجي او يتكلم و انا و الله قلت راهو برد توة او اتو ايجي ايريض اللعب او يطلب السماح من الحكم اللي طيحلو قدرو قدام الناس الكل؛ آخي السيد ما كانش خير من الكاتب العام متاعو اللي جاء في الاحد الرياضي و قال احنا ما خرجناش او الحكم هو اللي وقف المقابلة او بعد طلع يكذب عيان بيان؛ شيء يعمل العار؛ كان المسؤول هكة مالا اللاعبين او الجمهور كيفاش؟؟؟ سي الزاحف هذا كي تسمعو يحكي ايجي في بالك او كأنك تسمع في رئيس طايفة من الطوايف في العراق؛ كلام متاع حرب او مؤامرة و عقدة متاع تفوق اللي نعرفوها عند ياسر صفاقسية و اللي شخصيا مانيش عارف منين جاية؟؟؟ الراجل رد تونس بكلها جاية ضد الصفاقسية او متآمرين عليهم؛ هاك الجمعية العزيزة ياسر عاد؛ و الله أكثر جماهير جوفنتس او برشلونة تخلفا او عنصرية ما يحكوش هكة؛ او احنا رئيس نادي يحكي تقولش عليه مراهق في عركة متاع حومة؛ توة بالله جوارات صفاقس بركة اللي اتضربو ضربات خايبة؛ و لا امير الحاج مسعود - ربي يشفيه - خير من فان باستن او قوليت اللي خسرهم العالم موش فرقهم بركة؛ قالك ياسيدي ثمة عملية ابادة كروية موش عرقية المرة هذي ضد النادي الصفاقسي ؛ توة هذي حكاية يحكيها رئيس نادي في التلفزة؛ قالك ياسيدي موش لازم نلعبو احنا او نخليوهالكم واسعة او عريضة؛ و الله شيء ايضحك؛ موش غريب انو لينا 30 عام او احنا متبلغمين بالبهايم اللي نشوفو فيهم في الفريق الوطني؛ لانو مسؤولين كيما هاذم موش ممكن باش يعملو جوارات محترفة او كورة عندها قيمة؛ ناقص كان ايقولنا انحبو نعملو دولة وحدنا او بطولة وحدنا او ما نحبوش نلعبو مع لقعار لوخرين.
خلي عاد من الصخافي الخشين ياسر متاع الجريدة بودورو الصريح؛ اللي ناقص كان ايقول الله أكبر او ايخرج علينا سيفو؛ قال شنوة احنا حاسدينهم على خاطرهم خدامة او ناجحين في قرايتهم؛ انا انقول للصحافي هذا انو كان جاء الحكم من سوسة راهو ماحلش فمو او ما قالش اللي قالو؛ او اذا كان جاء شكري الواعر اللي ماخلى ماعمل في جوارات تونس هو اللي ضرب الملاعبي متاع صفاقس راهو الزاحف بلع السكينة بدمها اوماقال كلمةعلى خاطر شكري اوراه رجال؛ اما هذا حكم من وذرف بول عليه او يستاهل كي ما يخترمشي اسيادو؛ او ماتقولوليش انت لهنا تحرض على الجهوية
خاطرالجهوية او عقدة التفوق موجودة عند برشة صفاقسية؛ هذي تونس شبر او نص او كل واحد هازز خشمو على الآخر؛ والله شيء ايفدد