الاثنين، جوان 18، 2012

لا ثورة ولا هم يحزنون

صّمت آذاننا لسنة و نيف من تنظيرات جباهذة السياسة حول هذه الثورة المعجزة؛ ثورة قادها شباب غير مسيس؛ لا يحمل أية ايدولوجيا؛ و ظلت هذه الفكرة تروّج على أنها من محاسن الثورة؛ و بدعة’ تونسية ثم عربية؛ بدعة صنعت الربيع العربي؛ حالة فريدة في تاريخ الانسانية؛ ثورة بدون قيادات و بدون ايدولوجيا.
لا شك لدي أنه لم تكن هناك قيادات و لا ايدولوجيا لأن هذه الشعوب ظلت عاجزة عن انتاج فكر يصنع ايدولوجيا معارضة للدكتاتورية وبالتالي لم تكن هناك قيادات معارضة ذات عمق في المجتمع التونسي او العربي بصفة عامة؛  لم يكن عدم بروز تيارات فكرية او سياسية تقود الثورة أمرا اختياريا؛ من شعب أراد أن لا تفرقه الشعارات الحزبية؛ بل كان امرا واقعا فرضه تصحر المشهد الفكري و السياسي التونسي الذي فشل في انتاج مجتمع يؤمن فعلا بالديمقراطية و يتوق للحرية.
يتبادر للذهن هنا طبعا السؤال لماذا انتفضت الشعوب اذا؟
عندما يشتدد طغيان الدكتاتورية و يصل الى حد اعتقادها أنه يمكن لها أن تستبيح كل شيء؛ ولن تكون هناك اية ردة فعل من شعب مغلوب على أمره؛ عندما تطمان الى بقائها الى ابد الآبدين يشتدد غرورها و غباؤها؛ و يكفي أن تتذكر اية نشرة من نشرات الثامنة و ما تتحتويه من كذب قبيح لا يصدقه حتى المجانين؛ حتى تعلم مدى ثقة الدولة في أن شعبها يمكن أن يبتلع كل شيء و أن لا شيء يهددها.
شعب قامت الحكومة بتجهيله تجهيلا ممنهجا؛ شعب ظل عاجزا عن انتاج اي فكر او ايدولوجيا يمكن أن تقاوم الدكتاتورية. هذا الشعب مثله كمثل القط الذي اذا اشتد به الخطر؛ فانه للحظات يتحول الى نمر شرس يهاجم سيّده؛ لكنه سرعان مايرجع قطا أليفا مستكينا.
و هذا ما حدث مع الشعوب العربية؛ اشتدت بها الأزمة فانتفضت انتفاضة القط؛ و لأنه ليس هناك أجبن من الدكتارويات؛ فانها انهارت بسرعة.
ولكن هذا الشباب لا يحمل أية ايدولوجيا أو فكر بديل؛ مجرد شعارات عامة؛ من نوع حرية؛ مساوات؛ هوية عربية؛ هوية اسلامية و مطالب اجتماعية سرعان ماذهبت أدراج الرياح؛ رغم أن المطلبية كانت هي الوازع الأول "للثوار"( لذا كان من المفهوم أن الاتحاد العام للشغل كان تقريبا الجهاز الوحيد الذي حاول تأطير الثورة نسبيا؛ لكن دوره اقتصر تقريبا على المستوى الاعلامي و الدعم المعنوي)
و في ظل غياب ايدولوجيا او فكر بديل وجدت الشعوب العربية نفسها بين امرين اثنين لا ثالث لهما؛ 
--الاسلاميون يدعهم شعور ديني قوي لدى الشعوب الشرقية بصفة عامة و العربية بصفة خاصة؛ اضافة الى الدعم الاعلامي و المادي الكبيرين الذي لقيه الاسلاميون؛ فكان من السهل عليهم أن يملؤا هذا الفراغ.
--الحزب الحاكم السابق في ثوب جديد؛ هذا الحزب حكم البلاد لأكثر من نصف قرن و لديه قواعد اجتماعية كبيرة تدعمه؛ كما لديه خبرة كبيرة في التنظيم الحزبي و النشاط السياسي بصفة عامة.
فهذان التياران لا ثالث لهما في المجتمع التونسي و العربي بصفة عامة؛ بقية الفرق مازالت في المرحلة الجنينية و يلزمها الكثير من الوقت حتى يصبح لها عمق اجتماعي و دور سياسي. لذا كان من الطبيعي  أن يتنافس الاسلاميون و النظام السابق في مصر؛ و أن يفوز أحدهم على الآخر بفارق ضعيف؛ و كان النصر للاسلاميين مفهوما نظرا أن الكثيرين صوّتوا للاسلاميين عقابا للحزب الحاكم السابق.
في تونس ستشهد الانتخابات القادمة نفس الاستقطابات؛ الاسلاميون من جهة؛ و السبسي و التجمعيون في نسختهم الجديدة من جهة أخرى؛ هذا على أن كلى الطرفين قد يدخل في تحالفات مع بعض الأحزاب الصغيرة الأخرى؛ التي سيكون لزاما عليها أن تختار أحد الشقين؛ والا فانها ستكون خارج اللعبة تماما؛ على أن التصويت العقابي في تونس سينقسم بدوره بين الشقين؛ فهناك من سيصوت للاسلاميين عقابا للتجمعيين و آخرون سيصوتون للسيبسي عقابا لحكومة النهضة على فشلها في الوفاء بوعودها الانتخابية.
و بين هذا و ذاك سيظل المواطن التونسي و العربي ضحية عدم قيامه بثورة فكرية تؤسس لمرحلة ما بعد الكتاتورية.

الخميس، ماي 03، 2012

رسالة من وزير التعليم الاسرائلي قيدون صار الى وزير التعليم العالي المنصف بن سالم


الى زميلي العزيز المنصف بن سالم؛
اما بعد؛

 سمعت انك قد دخلت في اضراب جوع تضامنا مع الأسرى الفلسطينيين؛ و قد آلامني ذلك كثيرا. لأن ذلك للأسف سيزيد من ألم الفلسطينيين و ضعفهم؛ نحن يا زميلي العزيز نصول و نجول في فلسطين و العالم لأننا أقوياء بعلمنا؛ أقوياء بجامعاتنا؛ جامعاتنا تنتج المفكرين و الباحثين و العلماء؛ نحن نصنع سلاحنا بانفسنا؛ نبني و نشيد بمهندسينا و خبرائنا؛ هم سلاحنا؛ هم نتاج  جامعاتنا؛ جامعاتنا تحتل المراتب الأولى في ترتيب الجامعات العالمية؛ انظر هنا يا عزيزي؛ بينما الجامعات التونسية لاتوجد في اي ترتيب؛ انا حريص على أن تشتغل الجامعات الاسرائيلية ليلا نهارا لحماية أمن اسرائيل و لاحكام سيطرتنا على المنطقة؛ بينما تبعث انت بابنك ليوقف الدروس لشهور  في احدى الجامعات التونسية؛ جامعاتنا تنتج فكرا و صناعة حتى يظل علم اسرائيل يرفرف عاليا في السماء؛ بينما يدنس علمكم في الجامعات؛ علماؤنا متفوقون في اعرق المخابر الاروبية و الامريكية؛ نحن نبني جيلا يفكر  و يصنع؛ ليدافع عن اسرائيل و ليزج بكل من يشكل خطرا على امنها في السجن؛ هذا ان أمن القتل. و انت ماذا تفعل يا زميلي العزيز؟؟؟؟ تضرب عن الطعام؟؟؟ اذا كنت لم تستطع أن تدير شؤون وزارتك و أنت آكل شارب؛ فهل أنت فاعل و أنت مضرب عن الطعام؟؟؟
لقد انصفوك يا منصف عندما ولوك شؤون البحث و العلم؛ حتى تسلم اسرائيل يا منصف يا بن سالم؛ لن يغير اضرابك في الوقائع شيئا؛ بل زادنا اطمئنانا؛ أن من يتولى أمور البحث و العلم في تونس جمع بين فراغ البطن و فراغ العقل؛ لن يكون للعرب دور في القضية الفلسطينية اذا ظلت جامعاتكم بهذا المستوى؛ كان الأجدر بك خدمة لشعبك و لشعب فلسطين أن تسعى الى تطوير الجامعة التونسية لعلها تنتج فكرا و صناعة قد يشكلان خطرا على اسرائيل؛ اما اضرابك عن الطعام فلن يغير من الأمور شيئا؛ لأنه بامكاننا أصلا أن نجعل الشعب التونسي كله يضرب عن الطعام رغما عن أنفه؛ لأنه أضعف من أن ينتج قوته بنفسه و يحقق اكتفاءه.
لذا زميلي العزيز دمت مضربا عن الطعام و عن التفكير كما عهدناك؛ و أترك لنا أمور البحث و تطوير العلوم؛ فنحن شعب الله المختار؛ تذكر ذلك. و أخيرا أدعوك الى مشاهدة هذا الفيديو الذي أعددته خصيصا لك؛ حتى تعلم كيف تبنى الأوطان يا عزيزي؛  و حتى تدرك ما على وزير التعليم العالي القيام به؛ عوضا عن اضراب الجوع؛ الذي لا يغني و لا يسمن من جوع

شالوم
قيدون صار
وزيرالتعليم الاسرائيلي



السبت، فيفري 25، 2012

تونس هردت.....



حزب حاكم مديك يدعي انو يمتلك الاسلام او الناس لخرة الكل كافرة او كأنو الاسلام اكتشافناه معاهم؛ او نقابة قدمت او وخرت او ولات تحب تقود ثورة ضد الحكومة؛ بالحرام لا عاد فاهم شي؛ الدنيا الكل داخلة بعضها؛ او الشعب يتبع او برة مافاهم شيء؛ وقع اختصار الديمقراطية او الثورة في مع الحكومة ولا ضدها؛ المشكلة انو لا الحكومة المديكة قاعدة تحترم في قواعد الديمقراطية؛ تي آش جابنا للديمقراطية؛ مفهوم الدولة في حد ذاتو غايب؛ او اناهي معارضة هذي اللي تجري ورا ء نقابة باش تحقق اهدافها؟؟؟؟ قالك ماهوش معقول باش النقابة تبقى بعيدة عن ما يقرره المجلس التأسيسي؛ و الله شيء يحزن؛ انو المعارضة في تونس ضعيفة لهالدرجة انها ما تنجمشي تجيش الجماهير ضد الحكومة الا عن طريق المنظمة النقابية؛ مؤشر خطير ياسر على انو المعارضة فعلا في مأزق؛ لكن بما اني في المعارضة او ما نحبش نزيد نكب سعد المعارضة على قد ماهو مكبوب فاني باش نحكي توة شوية على البهامة متاع الحزب الحاكم اللي يدعي انو ديمفراطي او خاصة يؤمن بالتعددية؛ اول حاجة لازم يمن بيها حزب ديمقراطي هو انو باش يكون فاعل في دولة ولا في مجتمع ما موش لازم يسيطر على كل الميادين او يكون هو الفاعل الاساسي او الوحيد فيها؛ بالعكس فانو من مصلحتو انو يتقاسم الادوار مع قوى اخرى او يخلي المجتمع المدني يخدم على روحو؛ النهضة  او لانها حسب راي عمرها ما امنت بالديمقراطية او التعديدية فانها اعتقدت انو نتائج الانتخابات الاخيرة عطاتها الضو الاخضر باش تسيطر على كل الهياكل او هذاكا علاش شوفناها تحاول باش تعمل مثلا منظمات موازية لمنظمات عريقة موجودة ليها برشة كيما في الجامعة اتحادالطلبة مثلا؛ في الاتحاد العام للشغل حاولوا نفس الشي السيطرة عليه؛ من خلال مثلا اقتراح انو الناس اللي كانت في الحبس عندها الحق تدفع حق الاشتراكات متاع مدة الربطية او بالتالي بصبح عندهم الحق في التصويت؛ و لكن رغم ذلك فشلوا؛ او هذاكا علاش شنوا الحرب على الاتحاد او كلاساوه عدو؛  الحرص الشديد من طرف حزب معين على السيطرة على كل المنظمات او على كل القطاعات ماهوش ممكن ايجي من حزب يؤمن انو ماهوش وحدو في البلاد؛ اي حزب  يؤمن بالديمقرطية  كان يعرف انو من البديهي  انو مايكونش مسيطر على كل شي؛ بل يكون مقتنع انو هذا ماهوش في مصلحتو او موش في مصلحة الديمقراطية في البلاد؛ الشيء الايجابي في مظاهرة اليوم هو الكف اللي تعطى للخوانجية باش يعرفوا انهم ماهمشي وحدهم في البلاد او انو ماهوش ممكن باش يسطروا على كل شيء

الثلاثاء، فيفري 14، 2012

زعمة .....ثورة؟

        أول نهار في الثورة باش يكون نهار اللي يسترجل فيه الشعب التونسي او يستعرف اللي هو ماعملش ثورة؛ تنحية دكتاتور عمرها ما كانت تتسمى ثورة...ثورة تخلينا نجيبو واحد مهبول ايقول انو تونس مالزمهاش تكون علمانية اولازمها تطبق الشريعة؛ او الناس وراه تجهش بالبكاء؛ او حقوقي طول عمروا ينوح من البوليس السياسي كي شد الحكم اول حاجة عملها نحى البوليس السياسي او حولوا لبوليس الثورة؛ او مجموعة من الثقفود ركبوا على الموجة او صاروا ينظروا للثورة او يصنفوا في الثوار او الوطنيين او هاذا مناضل شد الحبس 15 عام؛ او هذا سكرولوا جريدتو؛ او هذا عطوه طريحة؛ او هذا اتدخلوا نلسن مندلا في حد ذاتو باش يخرجو من الفينقة؛ اما شنوة دورهم في الثورة اللي يحكوا عليها ولا في تغيير العقول او نشاطهم في المجتمع المدني فالبطبعة صفر؛ او هذاكا علاش جابوا صفر فاصل؛ او حتى الخواجنية ماكانش عندهم حتى تاثير في المجتمع بما انهم كانوا في الحبس؛ لكن كانوا مدعومين من اقوى حزب في البلاد اللي هو حزب النيل سات؛ او الاحتفاء الكبير باحد زعماء هذا الحزب في تونس الجمعة هذي اكبر دليل على ذلك- بطبيعة الحال باش يكون من السذاجة هنا اختصار انتصار الخوانجية في التحضير الايديولوجي اللي قام بيه حزب النيل سات؛ لكنوا يقعد من اهم الاسباب اللي حظرت الشعب التونسي باش يكون عندو التوجه التيولوجي هذا؛ لانو ببساطة الشعب التونسي شعب لا يقرأ ووقع سد قنوات التفكير و التعلم عمدا من النظام السابق فلم يبقى امامه الا التلفزيون و الانترنت؛ و بما ان هذه الاخيرة اقل انتشار من التلفاز؛ فكان من الطبيعي ان ينهل التونسي ما طاب له من العلوم وخاصة الشرعية منها من النيل سات و قنوات الجهلوت الوهابية بما انو حسب ما يقولوا المجتمعات الشرقية بطبيعتها متدينة؛ معناها بلغة توة الشعب مسلم ولا يستسلم؛ اما الغريب في الامر انو الشعب قبل عام كان مستسلم او ماهوش مسلم مطيح السروال؛ اما سبحان الله يهدي من يشاء؛ او بقدرة قادر اصبح كل الشعب ثائرا و مسلما و....الخ
الفترة هذي زادة عندها الثقفود متاعها اللي باش يعملوا البروباقندا اللازمة باش يصفقلهم الشعب؛ و لكن بما انو في الاول مازال مااوضاحش بالضبط السلطة لشكون باش نعملولها بروباقندا؛ فانو الناس الكل هبطت على الثورة؛ او رجعنا للغة الخشبية متاع قبل؛ اما في عوض تغيير 7 نوفمبر ولينا نحكوا على ثورة 14 جانفي؛ او في عوض الانجازات او التنمية متاع سيد الرئيس؛ ولينا نحللوا او نمجدوا في بطولات الشعب التونسي او مافيها باس كي ساعات نجبدوا على بطولات فلان او علان؛ او فلان كتب هاك العام مقال او انا كنت نبهت او نددت؛ او نحن لا نقبل المزايدات؛ او الشعب التونسي ذكي؛ او الشعب التونسي مناضل؛ او الشعب التونسي لا يساوم....الخ معناها كان عندنا واحد بركة بطل او يضرب في اللوغة؛ رقدنا صبحنا الشعب كامل يحشي فيه لبعضوا اما الحاجة الباهية المرة هذي انو اللوح متاع اللغة الخشبية متنوع  تنوع الشعب التونسي العظيم
الثقفود هاذم زوز انواع؛ نوع ماقبل 14 جانفي او نوع ما بعدها. النوع الاول هما الجماعة المطيحين في الخدمة هذي او اللي كانوا حتى لنهار 14 الصباح يمدحوا في انجازات السابع من نوفمبر  او يحكوا على العصابات الملثمة؛ او الفئة هذي بيدها تقسمت على زوز؛ فئة اندثرت لانو طحينها كان اقوى من انو ينجم يواصل بعد 14؛ كيما برهان او غيرو؛ او الفئة الثانية هي اللي كملت تخدم على روحها؛ جوست بدلت من السيد الرئيس لمدح الشعب التونسي او الثورة؛ كيما باعث القناة او هاك صالح لكل حاجة متاع الضريح؛ اللي ظهر فعلا انو صالح لكل حاجة او في كل زمان او مكان او عطى مثال هايل على التعددية متاع التفكير في تونس؛ الجماعة هاذم باش يبيعوا رواحهم مليح او ياكلوا الخبز لازمهم اضافة الى التبندير او اللغة الخشبية لازمهم ايسكروا اللعب قدام اي واحد باش ينافسهم او يقصلهم قسمهم؛ هذاكا علاش كيما كانوا قبل طايحيين في المعارضين ما يخلوا ما يقولوا فيهم؛ توة زادة تلقاهم منقزين على اي واحد ايوجه نقد للمجتمع التونسي؛ من نوع الشعب يعاني من قلة الوعي ولا اي محاولة لتنشيط المجتمع المدني باش يقوم بدورو اللي يلزموا ايقوم بيه؛ ايحولوا اي نقد من نوع هذا الى استهزاء بالشعب او استعلاء اشباه المثقفين المتغربين عن شعبهم؛ او احتقار للشعب او وين كنت كي ماتت الناس او كي شدينا الحبس او هات من هاك اللاوي؛ او في لخر ممكن ايطلعوك كافر؛ بحيث ان اي نقد او تحرك مدني يصور على انه ضد الشعب و حكومته المختارة؛ حكومة مختارة لشعب الله المختار؛ الشعب و السلطة و الثورة كلها دخلت حانة التقديس و ممنوع الاقتراب منها؛ او اللي باش يقربوا باش نعملوا فيهم ليستة قاللكم السيد الرئيس؛ او بقية الحكاية ماكم تعرفوها
الفئة اللي بعد 14 جانفي باش نخصصلها تدوينة  ولاممكن تدوينات خاصة بيها ؛ لانوا خنارها طويل؛ اما باش نلخص باش نقول اللي هوما ما يبعدوش ياسر على النوع القديم اما هما جوست ماكانوش ناشطين مع السابع من نوفمبر او نشطوا كان مع 14 جانفي؛ الجماعة هاذم ماهمشي اقل خطورة من الاخريين رغم تاريخهم النظيف


الثلاثاء، فيفري 07، 2012

لماذا لا تحاسب النهضة كما يريدون محاسبة البوليس السياسي

قالك عايلة لزهر الشرايطي قدمت قضية في السبسي؛ حاجة هايلة ياسر من ناحية المبدأ ولو اني نشك في براءة التوقيت انو جاء تقريبا مدة قليلة بعد ما سبسي برز على الساحة السياسية كمنافس محتمل للنهضة؛ على ذكر النهضة ما ثمة حتى محامي من هالمحاميين متاع الثورة يرفعنا قضية على حركة النهضة او ممارستها للعنف ضد الشعب التونسي؛ ولا مافماش منها حكاية العنف؛ على حد علمي ديلو ماكذبهاش الحكاية؛ معناها فمة أمل تطلع صحيحة هههه

النتائج الوخيمة لقرار الطرد السفير السوري

اليوم باش نحكي شوية على العواقب الوخيمة متاع طرد السفير التونسي؛ اللي على فكرة طلع ماهوش موجود اصلا في تونس هههه؛ اما هذي تو نرجعولها مرة أخرى لانو الموضوع اليوم هام ياسر او حساس( معناها عامل برشة حس)؛ او باش نتحدث على نتايجو في علاقتنا بالجزائر او الصين او روسيا؛ نبداو بالجزائر كيما يقولوا الاقربون اولى بالمعروف؛ ياسيدي الجزائر خذات في خاطرها من تونس او قاتلك القرار هذا انفرادي او ماهوش متماشي مع سياسة حسن الجوار او الاتفاقيات متاع الاتحاد المغرب العربي الكبير؛ او هذاكا علاش الجزائر قاتلك حتى انا ماعادش مشاورة تونس او طز في المغرب العربي او المصالح الاقليمية؛ او باش نسكر الحدود مع المغرب او باش ندعم البوليزاريو كان لزم نعطيهم السلاح باش يهردوا ملك المغرب؛ احنا كنا واخذين بخاطر بورقيبة او السياسة الرزينة متاعو في الخارجية؛ كي وليتو تبرطعوا خلي نبرطعوا حتى احنا؛ او المغرب قاتلك انا باش ننسحب من المجال الاقتصادي المغاربي او زيد تتهدد بالتخلي عن العملة الموحدة الخورو. باهي هذا المغرب العربي او تهردنا فيه؛ بالنسبة للصين قالولكم باش نسحبوا استثماراتنا من تونس الكل؛ اللي هي تقريبا ما فماش على خاطر الله غالب ماعندكمشي لا بترول لا ديامند؛ او بالنسبة لروسيا قالتلكم بالحرام لاما انعيفكم في ارواحكم بالثلج او البرد حتى لن تندموا على النهار اللي تفرجتوا فيه في اول مسلسل سوري؛ موش تطريد السفير؛ معناها لا عاد ينبت لا زيتون لا بردقان لا دقلة بروا امشوا لقطر تو تنفعكم؛ باهي هكة توة او احنا كنا معملين على روسيا او الصين باش يعملونا نهضة اقتصادية او يريحونا من النهضة متاع الخوانجية او قطر؛ ربي يهديكم

الاثنين، فيفري 06، 2012

خطاب اليسار

بغض النظر عن صواب قرار طرد السفير السوري او عدمه يبدولي انو اليسار التونسي ما تعلم شيء من الهزيمة متاع الانتخابات او اللي يلزموا يتخلى عن البرج العاجي اللي عايش فيه او يحط ساقيه في القاعة او يتعلم يكذب او يمارس خطاب شعبوي عاطفي باش فماش مايجيب حاجة في الانتخابات الجاية؛ الخطاب الشعبوي هذا عندو اوراق معروفة او تأكدت في الانتخابات الفايته؛ او ورقة الدين او اللي لعبت عليها النهضة بامتياز او الورقة هذي من اهم الورقات في المجتمع العربي؛ او اذا كان اليسار ايدولوجيا بعيد عن الدين فانوا نجح بالبهامة متاعو انو يخلي النهضة تنفرد بهالورقة بل او تصوروا انو عدو الدين؛ او الورقة الثانية هي الشعور القومي او دوة الهوية العربية او الوحدة او هاك اللاوي؛ اللي ركب عليها المرزوقي؛ رفض قرار طرد السفير السوري زاد حرق الورقة هذي او ولا اليسار لا يزيه معادي للدين الاسلامي؛ باش يولي توة معادي للعروبة او الهوية العربية او برة توة فسر للناخب التونسي العلاقات الاستراتيجية او الرصانة في السياسة الخارجية...الخ و الله كي نسمع جماعة اليسار يحكوا كأنو استاذ في علم الذرة يعمل في محاضرة في سبيطار المهبلة؛ لن يستطيع اليسار ان يقدم شيئا لهذه البلاد اذا لم يصحح في نوعية خطابه و يمارس خطاب سياسي يتماشى مع القاعدة الناخبة؛ انا مثلا باش ندافع على اليسار توة في القهوة باش نقول للناس راهو اليسار باهي اما يلعب ضد روحو كيما البلبولي الحارس متاع المنتخب؛ فهمتوا كيفاش نوعية الخطاب؟؟؟