السبت، جوان 23، 2007

الى مدير الشركة الوطنية للنقل بين المدن: كلنا توانسة والحقرة علاش؟؟




توة هذا معقول يار رسول الله؛ انكطو في 25 دينار باش الواحد يركب في سطلة تعيّف الواحد يدخلها يحس روحو باش يتقيء؛ علاش ديما الكار متاع دوز خردة او امسخة تعيف؟؟؟ اشبينا احني ماناش توانسة ولاّ نركبوا بلاش؟؟ انا نقول او متأكد اللي لحكاية متعمدة او فيها عنصرية واضحة؛ على خاطر علاش الكار متاع جربة مثلا ديما جديدة او امورها واضحة؛ انا مشيت ياسر مرات الى جربة في الكار؛ تقولش عليها كار في بلاد أخرى؛ مانحكيش عادة على الكيران متاع نابل هذوكم خلي اوسكت؛ في باب عليوة موش لازم تقرى البلاكة متاع كار دوز؛ شوف اناهي الخردة فيهم اركب فيها توصلك لدوز؛ عاملين فينا مزية جماعة الشركة؛ ناقصين كان يقولنا تي احمدوا ربكم تسكنوا قي الصحراء و عاملينكم كار؛ يا خويا كي حاقرينا على الأقل ما تكذبوش علينا او تقولونا كار كونفور او مكيفة؟؟ ممكن صحيح احنا جبورة او متاع صحراء لكن احترموا ذكاءنا او ماتكذبوش علينا جهارا نهارا؛ قال شنهي كار كونفر او مكيفة؛ هذي كاركم ماهيش كونفور و لكن كافار ياسيدي او متاع حيوانات؛ او هو راهو في الواقع لحكاية ما هيش مقتصرة على هل الكار متاع وذني؛ المناطق الداخلية الكلها تعاني من التمييز؛ لا كياسات باهية لا تجهيزات لا اماكن ترفيه؛ تمشي للعاصمة ولا الساحل تقولش عليك في بلاد أخرى او بقية الشعب ايروح......؛او زيد يا سيدي السيد الشوفار متاع كار دوز يظهرلي ماهوش فاهم اللي هو يسوق في كار وطنية؛ يسخايلها متاع باباه يركب فيها اللي يحب او يوقف وين يحب؛ نهار 21 جوان في الليل خوكم يستنى في الكار في براكة الساحل باش نروح؛ يعمل هكة سي الشوفير هذا ما يقوفشي في المحطة؛ هزيت يدي عيطت زمرت شيء؛ يعجبكشي توة؛ انا شفت الكار فارغة فيها بلايص؛ علاش ما وقفش السيد؟؟؟ يسوق في الكار متاع باباه يوقف كان وين يحب؛ واللي زاد طلعلي الدم؛ كي خذيت التران لقابس او خلطت على الكار في قابس؛ كلمتو السيد؛ شبيك ما وقفتليش؟؟ ماريتنيش؟؟ قالي لا ريتك اما لازمك تخرج عل الكياس او تهز ايديك الزوز باش نوقفلك؟؟؟ توة هذا كلام؟؟ قتلو ياسيدي هذي ولات تكسي مالا ماعادش كار؛ ولا بالكشي نعمل في ستوب باش نركب بلاش؟؟ هيا معليناش؛ طلعت للكار لقيت زميل يقري معايا؛ قالي رانا شفناك او كلمناه باش يقوفلك آخي طفانا؛ خوكم زدت فديت او روحي طلعت هيا مشيناش 30 كم وصلنا للحامة؛ ثمة حرس على جنب الثنية ما هوشي في دورية ولا اون سرفيس ؛ او ماهوشي واقف في محطة؛ دوب ما هز يدو ظاهرة متاع واحد يعمل في ستوب ؛ يضربها فران او يطلع السيد الحرص طلع ماشي لدوز حتى هو؛ ماهو هو تونسي او انا لا؛ التوانسة اللي كيفي يظهرلي ما عاد عندنا الحق في حتى شيء كان طرف الاكسيجين ربي يستر لا يقصوها علينا حتى هو ولا يعملونا فيه ضريبة خاصة بجماعة مناطق الذل؛ ما هو هذيكا ماهيشي تونس و بيني او بينكم انا وليت نفد من هل الكلمة الماسطة ياسر او اللي شخصيا ساعات نفد او نكشكش او نلقاها كلمة تونس هذي ماعادش تعنيلي ياسر حاجات ؛ اهم حاجة فيها هي الباسبور الي ساعات ينوب ربي او نخرج بيه من هل ميزيريا اللي يسموا فيها اللوخيان اللي يركبوا في الكيران النظيفة تونس الجميلة.
هذه الصور التقطتها في حافلة دوز يوم27.04.2007 على الساعة العاشرة و النصف صباحا عندما كنت متجها الى العاصمة


بواة فيتاس لاصقة بالسكوتش



سقف مهترئ



تلفزة من عام ككح فاسدة بالطبيعة



ارضية لم يعد معروفا ما هو لونها الاصلي



فتحة للتهوئة



كرسي مكسر مشدود بخيط من الفوق او رقاعة من لوطة



كرسي مهري



كرسي مهري او مسخ


هناك 15 تعليقًا:

3amrouch يقول...

الصبر يا ادم ما تنساش انو التونسي لتونسي رحمة

غير معرف يقول...

نمشي معاك أما التلفزة ألمانية الصنع راهي ماهيش تونسية
..

Soly Z. يقول...

Plusieurs facteurs y jouent un rôle (même s'ils ne sont pas suffisants pour justifier l'etat des choses) : 1.) Les autres bus transportent souvent des touristes 2.) l'amortissement dû au long trajet et aux mauvaises routes est plus grand sur le trajet vers Douz 3.)le concept de respect des biens plubiques ou des moyens de transport en particulier differe chez les citoyens (en moyenne) souvent selon la region ou ils habitent 4.) les differences en infrastructure entre les regions du pays ont toujours été là depuis des siècles et cela ne va pas changer en quelques decennies

Tut mir Leid Adam, dass ich Dir keinen besseren Bescheid geben kann, aber so ist es nun mal.

Adem Salhi يقول...

@3amrouch مانيش ناسي
@Tarek والله يعطيك الصحة لاحظتها؛ انا واالله ما انتباهتش؛ اما هذيكا ماركة من ايامات الثمانينات ياحسرة؛ معناها عمرها توة اكثر من 20 عام
:D
@ soly
آسف اما راهو افكارك قديمة شوية؛ الطريق الى دوز توة من احسن الطرق في الجمهورية؛ هذا اضافة الى انو دوز منطقة سياحية مهمة؛ اما من ناحية انو الاستحفاظ يفرق من جهة لاخرى هوني مانيش باش انرجع عليك؛ اون تو كا انا قلت الي احنامعتبرينا جبورة
Danke für die Komplimente!
:D

AntikoR يقول...

على ذكر كيران نابل.. في بالك توا حاطولنا فيهم تلافز LCD ? :)

ما نحبّش نزيد على ما بيك أما راهي كيران نابل و حمامات تابعين للشركة الجهويّة متاع نابل و يهبطو برشا برشا برشا برشا برشا فلوس بما أنو برشا ناش تمشي و تجي بين نيبل و تونس و 90 بالمئة منهم توانسة و موش توريست..

نتصوّر ألي الأمور تتحسن إذا كان يعملولكم كار كونفور تابعة للجهويّة متاع دوز يكون الشوفور منكم و إليكم باش يكون يوصلكم حتّى باب الدار كان لزم..

Gouverneur de Normalland يقول...

wallahi 7atta car Jerba , dakourdou mouch kif 7allet car douz, leken 7atta hia techki el rabbi ! ena wa7ed mel ness twil chwaya ..sa9ia ma nel9a win n7othom fi hek el car !

Tarek طارق يقول...

هذية كار مريضة بالجدري و الروماتيزم.... أما السلوك متاع الشوفار يظهرلي ماهوش خاص بالكار متاع دوز حسب ذكرياتي على الاس أن ت ري

غير معرف يقول...

Tu as bien fait d'écrire ce post.

Il ne faut pas s'arrêter là. Il faut au moins écrire au directeur de la société en question.

Bon courage.

abunadem marzouki يقول...

الحكاية باينة يا ادم علاش ما حكيتهاش تي ماهو باش كار اكسبراس متاع الجماعة تخدم املا وينك

Amal Koala يقول...
أزال المؤلف هذا التعليق.
غير معرف يقول...

bonjour,

Je me permets de te repondre en toute sincerité et objectivité. Il faut rendre a Cesar ce qui est a Cesar et dieu ce qui est a Lui. Au depart l'etat Tunisien ne fait pas de descrimination, mais au fur et a mesure, il y a les gens ( utilisateurs ) c'est eux qui degradent ces moyens de transport/les stations/tout ce qui tombe sur leurs main. Et vous voyez du coup que tout de suite la difference entre les regions, et ne me dites pas que c'est pas vrai ! Il ne faut pas cacher le soleil par un tami ! Il ne faut pas avoir un complexe d'inferiorité , il y a certaine verités qu'il faut accepter , c'est malheureux de le dire mais c'est comme ca !!! Je suis de Nabeul et je vois depuis une dizaine d'année les chnagment qui arrive sur la flotte de bus, le bus confort est degradé par les "gens peu eduqué !!!" qui se trouve ( coincidence ou pas a vous de juger ) des gens de "nouzouh" ou des meme et ce qui est grave des etudiants qui arrivent de regions et d'autres !!! ils ne respectent rien , ils mange dans le bus, fument, font du bruit, font l'interessant, ..... Je vous jure c'est pas du racisme mais juste je vous relate une dur réalité des faits .... a vous de me croire ! Alors je vous dis il ne faut pas avoir un complexe d'inferieorité, mais une majorité de gens/utilisateur de ce bus ont fait que le responsables ne chnage plus le bus ( apres tout , hraam wallah de mettre de l'agent dans de nouveau bus qui seront degradé tout de suite apres ) ne me dites pas faisont l'experience, ca ete deja fait a mainte reprise.

En parlant de bus, plusieurs bus ramenant des excursions a nabeul, je vois ces gens profiter du peu de gazon qu'il, le peu de propreté que la municipalité a reussi a maintenir, et toute de suite apres, apres leurs passage, leur lieu devient une poubelle publique, dites moi que ce n'est pas vrai tout ca ? dure réalité !!!
Avant de parler, je vous invite a etre consient de la réalité et ne pas etre idealiste et voir la télé et comparer et se sentir tout le temps vicitme !

amicalement,

Adem Salhi يقول...

@مجهول
آه معناهاتحب تقول اللي النوابلية او السواحلية كيرانهم نظيفة او كياساتهم مريقلة على خاطر هما متربيين او اولاد عايلة؛ اما البقية قعار او جبورة؛ او هذاكا علاش الوزرة او رؤوس الاموال كلها من غادي؛ على خاطر زادة البقية بهايم او ما يفهموش لا في البوليتيك لا في التجارة؛ او نزيدك بزيادة آخي بقية البلايص آش اتدخل هي للحكومة؟؟ طرف البترول ماهو في سوسة؛ الفسفاط ماهو في نابل؛ القمح ماهو في الحمامات؛ او التمر في المنستير؛ او الزيتون في الكاب بون؛ او الاندوستري شيميك متاع لبلاد في حمام سوسة؛ او زيد الخير متاع ليبيا الكل ايجي بالطيارة للمستير؛ والحوت و السياحة ما ثمة كان في الحمامات مانيش فاهم على نصرفو عليهم الجبورة المسخين متاع المناطق الداخلية؛ والله بردتلي على قلبي يعطيك الصحة؛ كي تحكي معاهم هكة يقولوك انت عنصري او ضاربتلك في روحك عل الفارغ؛ ماهمشي متربيين

Adem Salhi يقول...

@مجهول
آه نسيت ما قتلكشي اللي انا نعرف تونس او التوانسة مليح؛ او درتها او الحمد الله تقريبا الكل؛ او كان قريت المقال مليح راك شفت اللي انا كنت في نابل الجمعة الفايتة؛ دونك الحكم متاعي جاي من معايشة للواقع موش من التلفزة؛ اما انت جيت لدوز او تعرف عبادها؛ ما نظنش؟؟

غير معرف يقول...

المناطق الداخلية الكلها تعاني من التمييز؛
يا ادم تونس راهي حدها حد الاوتوروت....انا بحكم خدتي نمشي برشا للارياف....ما دوخش لوكان انقلك دوز مسلكتها على برشة بلايص...ما تبدل فيها كان اسم الشارع الكبير.....

نحنا راهو اذا عملنا حاجة نعملوها للتورست....التوانسة...الوبا والكرد...الكلنا في هذي كيف كيف....برا اعمل طلة عالحوم العربي الي في العصمة في نابل ولا في سوسة....و اتوا قلبك يوجعك....

تي الحاصل يعطيك الصحة في البوست....حتى المدونات الي من داخل الجمهورية يتعدو عالصوابع....الصبر و برا....

غير معرف يقول...

هذه الطريقة اللي يخدموا بيها جماعة تونس
الكار بعد ان تخدم 10 ولا 15 عام في تونس والشمال والساحل
يعطوها لجماعة الجنوب والمناطق الداخلية
ويهبطوا الجديد للاخرين