الى مدير الشركة الوطنية للنقل بين المدن: كلنا توانسة والحقرة علاش؟؟

توة هذا معقول يار رسول الله؛ انكطو في 25 دينار باش الواحد يركب في سطلة تعيّف الواحد يدخلها يحس روحو باش يتقيء؛ علاش ديما الكار متاع دوز خردة او امسخة تعيف؟؟؟ اشبينا احني ماناش توانسة ولاّ نركبوا بلاش؟؟ انا نقول او متأكد اللي لحكاية متعمدة او فيها عنصرية واضحة؛ على خاطر علاش الكار متاع جربة مثلا ديما جديدة او امورها واضحة؛ انا مشيت ياسر مرات الى جربة في الكار؛ تقولش عليها كار في بلاد أخرى؛ مانحكيش عادة على الكيران متاع نابل هذوكم خلي اوسكت؛ في باب عليوة موش لازم تقرى البلاكة متاع كار دوز؛ شوف اناهي الخردة فيهم اركب فيها توصلك لدوز؛ عاملين فينا مزية جماعة الشركة؛ ناقصين كان يقولنا تي احمدوا ربكم تسكنوا قي الصحراء و عاملينكم كار؛ يا خويا كي حاقرينا على الأقل ما تكذبوش علينا او تقولونا كار كونفور او مكيفة؟؟ ممكن صحيح احنا جبورة او متاع صحراء لكن احترموا ذكاءنا او ماتكذبوش علينا جهارا نهارا؛ قال شنهي كار كونفر او مكيفة؛ هذي كاركم ماهيش كونفور و لكن كافار ياسيدي او متاع حيوانات؛ او هو راهو في الواقع لحكاية ما هيش مقتصرة على هل الكار متاع وذني؛ المناطق الداخلية الكلها تعاني من التمييز؛ لا كياسات باهية لا تجهيزات لا اماكن ترفيه؛ تمشي للعاصمة ولا الساحل تقولش عليك في بلاد أخرى او بقية الشعب ايروح......؛او زيد يا سيدي السيد الشوفار متاع كار دوز يظهرلي ماهوش فاهم اللي هو يسوق في كار وطنية؛ يسخايلها متاع باباه يركب فيها اللي يحب او يوقف وين يحب؛ نهار 21 جوان في الليل خوكم يستنى في الكار في براكة الساحل باش نروح؛ يعمل هكة سي الشوفير هذا ما يقوفشي في المحطة؛ هزيت يدي عيطت زمرت شيء؛ يعجبكشي توة؛ انا شفت الكار فارغة فيها بلايص؛ علاش ما وقفش السيد؟؟؟ يسوق في الكار متاع باباه يوقف كان وين يحب؛ واللي زاد طلعلي الدم؛ كي خذيت التران لقابس او خلطت على الكار في قابس؛ كلمتو السيد؛ شبيك ما وقفتليش؟؟ ماريتنيش؟؟ قالي لا ريتك اما لازمك تخرج عل الكياس او تهز ايديك الزوز باش نوقفلك؟؟؟ توة هذا كلام؟؟ قتلو ياسيدي هذي ولات تكسي مالا ماعادش كار؛ ولا بالكشي نعمل في ستوب باش نركب بلاش؟؟ هيا معليناش؛ طلعت للكار لقيت زميل يقري معايا؛ قالي رانا شفناك او كلمناه باش يقوفلك آخي طفانا؛ خوكم زدت فديت او روحي طلعت هيا مشيناش 30 كم وصلنا للحامة؛ ثمة حرس على جنب الثنية ما هوشي في دورية ولا اون سرفيس ؛ او ماهوشي واقف في محطة؛ دوب ما هز يدو ظاهرة متاع واحد يعمل في ستوب ؛ يضربها فران او يطلع السيد الحرص طلع ماشي لدوز حتى هو؛ ماهو هو تونسي او انا لا؛ التوانسة اللي كيفي يظهرلي ما عاد عندنا الحق في حتى شيء كان طرف الاكسيجين ربي يستر لا يقصوها علينا حتى هو ولا يعملونا فيه ضريبة خاصة بجماعة مناطق الذل؛ ما هو هذيكا ماهيشي تونس و بيني او بينكم انا وليت نفد من هل الكلمة الماسطة ياسر او اللي شخصيا ساعات نفد او نكشكش او نلقاها كلمة تونس هذي ماعادش تعنيلي ياسر حاجات ؛ اهم حاجة فيها هي الباسبور الي ساعات ينوب ربي او نخرج بيه من هل ميزيريا اللي يسموا فيها اللوخيان اللي يركبوا في الكيران النظيفة تونس الجميلة.
هذه الصور التقطتها في حافلة دوز يوم27.04.2007 على الساعة العاشرة و النصف صباحا عندما كنت متجها الى العاصمة

بواة فيتاس لاصقة بالسكوتش

سقف مهترئ

تلفزة من عام ككح فاسدة بالطبيعة

ارضية لم يعد معروفا ما هو لونها الاصلي

فتحة للتهوئة

كرسي مكسر مشدود بخيط من الفوق او رقاعة من لوطة

كرسي مهري

كرسي مهري او مسخ