الأحد، جوان 17، 2007

يا حسرة على فخار بكري


أي نعم يا سيدي انا ما نحبش ام كلثوم متاعكم هذي؛ او تفوه على الحسرة على ناس قبل؛ او على كتاب قبل؛ قالك التراث؛ او احنا متخلفين على خاطر نسينا اصلنا؛ او الرجوع للاصل ولا الاسلام هو الحل؛ قالك ياسيدي احنا متخلفين على خاطر نسينا اصلنا او ماعادش اوريجنال كي جدودنا؛ ياحسرنا كي كنا قبل؛ احنا جماعة الايدولوجيا؛ كنا او كنا...؛ موش كيما البهايم متاع توة؛ كنا نطالعوا او نقروا او الناقشوا او او او .... او خريتو فيه با با؛ آش عملتوا فيها ؛ لقيتوا موضة اليسار في اوروبا تبعتو؛ سمعتوا بحركات التحرر تبعتواآش عملتوا.... بوريقبة جابلكم أحسن الاساتذة من ميشال فوكو او انت ماشي شديتو الجامعة دورتوها تبزنيز او طلعتوا القحاب ولات تحكم باحكامها؛ تكركروا او تعاودوا في كور بايت او شطر لايمات غايبين او تسبوا في الطلبة؛ قال شنوة؛ المستوى طايحح ياحسرة على قبل؛ شديتو السياسة عملتوا العار بالطحين و القوادة؛ و تقولونا مجاهدين او مناضلين؟؟ التلاميذ الكل بهايم؛ يا حسرة كي كنا قبل؛ آش كون بههم ها التلاميذ ولا جاو بهايم خلقي؛ او انتم جيتو عباقرة خلقي؛ الدول المتقدمة متقدمة على خاطر الاجيال السابقة خدمت او ضحات او صنعت العجب باش اولادهم يطلعوا اذكياء او عيشوا لاباس ؛ او انتم آش عملتوا؟؟؟ حال توة آش كون مسؤول عليه؟؟ زعمة أحنا؟؟ الشباب البهيم المستك اللي ما يفهم شي من الايدولوجيا؛ شباب ستار أكاديمي او هيفاء وهبي؟؟ يا حسرة على صناديد قبل؛ صحيح بابا هاذوكم في الجامعة قراوهم الفرانسيس ؛ خسارة احنا ما حضرنالهمش؛ احنا جينا لقيناكم فيها؛ مدورينها سوق او دلال؛ بلاد هردت او الدنيا جابت ما عندها؛قالك شباب توة ماهوش متربي او ما يقدرشي الكبير؛ يا حسرة على فخار بكري؛ شباب توة قالك يا سيدي هابط من السماء؛ ولا ممكن جاي من امريكا او صناعة اسرائلية باش يفسد المجتمع العربي العظيم؛ الامة متاع 67 او ما جاورها من عباقرة الديمقرطية في عالمنا العربي القمقوم ياسر؛ موش كيما شباب توة لا مستوى لا اخلاق لا قيم؛ شباب يسمع في الراي او الراب او الهيب الهاب او موسيقة الفزاني؛ يا حسرة على ام كلثوم او عبد الزواب او جغمة او بلية؛ او لحكاية او ما فيها الي احنا قبل كنا نفكروا او نطالعوا؛ اما توة؛ شكون مازال يفكر ولا يطالع؛ بالامارة انا عمري ما شريت لولدي كتاب؛ او نزيدك بزيادة؛ ولدي عمري ما شافني نقرا في كتاب؛ ماكم تعرفوا توة التلفزة فيها كل شي؛ حاصيلو جيل توة جيل مايع او مانيش عارف منين جاي؛ اللطف؛ غريبة و الله؛ ياحسرة على ناس قبل؛ هذا لازم سحر اليهود؛ ماهم ما يخلوا ما يعملوا السقاط الكلاب؛ حطمونا كنا أحسن عباد؛ اما اليهود الله لا تربحهم؛ آش شنوة الحل توة؛ و الله مانيش عارف؛ هيا انا ماشي للقهوة توة عندي طرح رامي.
بابا آش بيه الفيزيك نقراو فيه بالسوري؟؟؟ ماهم القورة ما خلاونا علاش نولوا.

هناك 7 تعليقات:

mahéva يقول...

هاذيكا مشكلتنا أحنا ما نتعلموش من الأخطاء متاعنا و ما نسمحوا لحد باش يقيمنا. على خاطر أحنا كبار أحنا ديما صحاح. و الخطأ متاعنا يولي صواب و الهزيمة متاعنا تولي نصر و الكبوات متاعنا تولي تجارب ناجحة
و ما تسمع كان اسمع كلام بوك و كلام خوك الكبير و كلام أشتاذك حتى لو كان يقلك راهي النجوم موجودة في عز القايلة

عماد حبيب يقول...

من فات قديمه تاه
الي مالوش كبير بيشتري له كبير
ما ينكر أصله كان حاشاكم الكلب
البل على كبارها
حتى كان كبارها التالي موش القدام

:)))

و زيد احنا احسن ناس في الدنيا ، و باش نفتحوا روما ، ثمة حديث صحيح بهذا،

بربي خليونا راقدين ،

ahlem يقول...

تحفون ياسر البوست هذا حقّك سمّيتو كنتم خير أمّة أخرجت للنّاس
حاجة بركة في اخر النّص ولّيت تتكلّم كيما خالتك فلانة cousine berthe

SkyDancer يقول...

هايل البوست هاذا يا ادم!
اما انتي تعمل في نفس الغلطة متاعهم والي هيا التعميم.
ما نجموش نعممو وو نحكيو على جيل كامل كونشي علينا نحكيو على سيري كاسارونات!
كل جيل فيه الباهي والخايب.

و بابا الحاج، كان انت طالعت برشا كي كنت صغير تبارك الله عليك، انا توا نجم نخليك تشوف بنتك الي في فرانسا ونخليك تحكي معاها بلاش. كمل قلي فخار بكري توا.

Big Trap Boy يقول...

أنا بيدي ديما نقول نفس الكلام هذا

ناس بكري آش من كلاب، قالّك السلوك الحضاري لازمنا نخليولهم بلاصتنا في الكار والميترو، وهوما سلوك حضاري وإلاّ لا كيف خلاّولنا بلاد متخلّفة؟

ناس بكري، الحاجة الوحيدة فيهم هي أنهم قريب يموتو

ريح السدّ

adam يقول...

@mahéva
او يظهرلي ما ناش باش نتعلموا
@ عماد
تحب تقول عبينا منه شكاير هل الكلام؛ اما هات آشكون يفهمك
:D
@ahlem
شكوني خالتي هذي ما نعرفهاش؟؟
:D
@skydancer
عارف اللي فيه تعميم البوست متاعي؛ أكيد ثمة الباهي او الخايب في كل جيل؛ اما حبيت نركز على الظاهرة هذي تحديدا
@big trap boy
نسخايل روحي ماخليت ما قلت؛ اما هذي قوية حكاية احسن حاجة انهم قربوا يموتوا
:D

ابو ناظم المرزوقي يقول...

انا يظهرلي لا عاد ينفع فيها فخار بكري ولا فخارتوا ويظهرلي فخارنا الكلو تكسر ما عادش يهز لا ما ولا زيت بعد اللي الخو ولا يهرد في خوه على مصلحة ولا كرسي يظهرلي يلزمنا نفكروا نلتحوا بالاتحاد النسائي ويا ربي نلقوش فيه بلاصة