غزة.....؛

هيا توة يلزمني نعمل حاجة لغزة... هيا برة ندون.. انا دونت من اجل كل شيء خلي غزة... احم.. بسم الله الرحمان الرحيم.. غزة.. غزة... آش باش نكتب... مانيش عارف آش باش نقول؟؟ مساكن.. ايسخفوا... زايد الكلام ما عندوش حتى معنى او زيد يظهرلي باش نطيح في التنديد و الشجب او نولي كيفي كيف هاك الطرحة ولا عياذ بالله من هاك الجماعة..عملت طلة على الجزيرة... شهيدان و ثلاثة جرحى في غارة جديدة على غزة...هممم تي آخي الشهداء موش ماشين للجنة؟؟ و الجنة ماهي شيخات او جو او ربوخ... عاد مالا فاش قام هالخوضة هذي الكل و الغش على اسرائيل؛ تي هاهي تبعث في الجماعة للجنة؛ آشكون كيفهم؛ ربي يعطينا ملي عطاهم. آمين ربي العالمين...آه نسيت لازم الجماعة متغششين على الجرحى و اليتامى؛ و الله برجولية موش عدل؛ زوز يتضربوا بنفس القنبلة؛ واحد يمشي للجنة و الشيخات؛ او واحد يعيش معاق او تولي حياتو جحيم في جحيم؛ لذا ماذابينا كان الجماعة في القمة متاعهم يكلموا الاخوة الامريكان ايزيدوا شوية في ذكاء القنابل الذكية هذي باش تولي تبعث للجنة بركة؛ تي قول هم لازم يعملوا فيها بلعاني حاسدينا؛ الله لا تربحهم؛ هيا آش امدخلني انا توة في هالبعبوكة هذي الكل؛ انا توة نحب نعمل حاجة لغزة؛ آه هاو هاهو قالك عملونا صندوق لغزة؛ هيا برة نتبرعوا بطرف فلوس و ياناس ماكان باس؛ اهوكا الواحد ايريح ضميرو؛ اضعف الايمان كيما يقولوا؛ هيا حسيت روحي رتحت جبدت باكو الدخان باش نعمل سبسي آخي وجهي اصفار... لقيت تحتو ورقة الماء و الضوء.. نسيت ما خلصتهمشي.. يا ولاّ عملة؛ هيا دورتها في راسي اما ابجل توة قضية الماء و الضوء ولاّ القضية العربية... كيفاش توة هذا كلام؛ وين الشهامة العربية.. وين الدم العربي.. وين الملايين وين... وبيني و بين روحي نقول وين الدنانير.. كلاتها الصحاح؛ او وليت نفكر؛ او على فكرة حالة التفكير هذي ما تجينيش ديما؛ تجي كان مع ورقة الماء والضوء ولاّ بالطبيعة في القضية العربية؛ او وين تجيني تمكني الرعشة و نحس بالكبي؛ توة كي ندز فازتي مع القضية العربية او نتبرع او ما نخلصشي الماء او الضوء..توة يقصوا عليّ الماء او الضو؛ بالطبيعة ما نقصدشي اسرائيل هوني و لكن نقصد الستاغ او الصوناد؛ او باش نولي نطيب على الحطب او نجيب في الماء من الواد كان فيه ماء؛ معناها باش توليلي غزة في الدار؛ عاد غزة في التلفزة ولا غزة في الدار؛ او زيد كان ماهجتشي المرا او مشات لدار بوها؛ و توليلي وقتها مشكلة عودة اللاجئين او برا آش باش ايسلكهالي وقتها؛ هيا برة سيب علينا من فكرة التبرع او الصندوق هذي؛ او زيد وصلتلي أخبار من صاحبي كبير النجارة في تونس قالي راهو سوم اللوح غلى ياسر مع الازمة الاقتصادية الاخيرة هذاكا علاش الصنادق ولينا نعملوا فيهم كونتر بلاكي ساهل تكسيرهم؛ قلت بيني او بين روحي لازمني حويجة بلوشي؛ آش قعد؟؟ هيا برا نتبرعوا بالدم؛ هذي فكرة هايلة؛ تنجم تنقذ روح بشرية او ما تتكلفشي فلوس؛ هيا هزيت روحي او مشيت لمركز الدم؛ حطوا الابرة؛ شيء... شيء ماخرج؛ ماثماش دم؛ آه حليلي... الشكارة اللي يحطوها تتطرشق بالهواء؛ ياولاّ حشمة؛ ماعادش فيّ دم قعد كان الهواء.. او انا نقول قلبي موتور الدم واقف ليه مدة؛ او كان موتور الهواء يخدم او يعمل في الحس او الريحة النهار الكل؛ مشيت خوك مظلّم ما عارف وين نشب؛ اول بار عرضني دخلت ضربتها سيس دوز؛ كي عرفت روحي سكرت عملت روحي ماشي للتوالات او قلت حاح على ساقيّ؛ محلاها السكرة البلوشي؛ انا هكاكة نسمع في الحس ورايا؛ نشوف في مظاهرة كبيرة؛ اعلام..او تصاور..فلسطين او تونس؛ هيا من غير مانشعر دخلت نعيط؛ فلسطين عربية- فلسطين عربية؛ او فكيت علم من واحد بحذايا؛ نلقاه سي الفرجاني؛ آه اهلا بسي الفرجاني؛ وصلتك القضية اللي بعثتهالك؛ اهوكا كيما قتلي بالضبط؛ وقتاش تجاوبوني على هاك الدوسي راني معمل عليك؛ قالي لا تهنى امورك واضحة؛ اما زيد طل عليّ نشربوا قهوة مع سي فلان؛ قتلو شنوة قهوة أخرى؛ قالي اللازم لازم... قتلو آه باهي.. وفلسطين عربية وروحت تعشيت؛ حطيت الجزيرة و خدمت موتور الهواء

.................

..............................

التدوينة البيضاء .....عربية ايضا

التدوينة البيضاء اصبحت للاسف تقليدا سنويا للمدونات التونسية نظرا للحجب المتواصل الذي عانت ولا زالت تعاني منه المدونات التونسية؛ حجب يطال كل مدونة تتخطى الخط الأحمر المرسوم في اذهان "عمال" الرقابة ( و افضل هنا لفظة عامل رقابة على لفظة عون رقابة لاني لا أرى في مهمتهم هذه عونا او مصلحة تذكر)؛فضاء التدوين خلق ليكون مجالا للتعبير الحر نجح الشباب التونسي كغيره من الشباب العربي في السيطرة على تقنياته و خلق بذلك لنفسه فضاء موازيا للتعبير لم يعد مظطرا فيه للعبور عبر القنوات الاعلامية التقليدية؛ فبرزت بذلك لغة جديدة تعبر عن هموم الشباب و مشاكله و اصبحت لما تتميز به من عفوية و صدق تجلب جمهورا سئم اللغة الخشبية السائدة في الخطاب الاعلامي الرسمي؛ نجاح المدونات العربية ما كان ليمر دون عقاب في بلاد لا يسمح فيها بحرية الرأي الا في الرياضة و الفن؛ فكان الحجب المتواصل للمدونات و المواقع؛ بل وصل الأمر الى السجن و الاختطاف كما حصل مع مدونين في مصر و السعودية و المغرب؛ لذا ادعو هنا كل المدونات العربية الى مشاركتنا في هذه الحملة السلمية للتنديد بالحجب و المضايقات التي يتعرض لها المدونون في كل البلاد العربية؛ يمكنكم المشاركة في الحملة بوضع احدى شعارات الحملة و تسجيل تضامنكم معنا في مدونة ضد الحجب حتى نتمكن من احصاء عدد المشاركين و شكرا لكم مسبقا

انقر على لوقو لتحصل على الكود

اعملوا جمعية... او امشوا العبوا في دحدح

هيا قالك يا سيدي آش قولكم كان نعملوا جمعية؟؟ فكرة تظهر باهية من ناحية المبدأ؛ لكن زعمة تجي زعمة جمعية للمدونين؟؟؟ شكونهم ساعة المدونين؟؟ تي شطرهم ناس موش معروفين او ماعندهم حتى علاقة ببعضهم ولا حتى مصلحة مشتركة؛ هل يمكن انوا التدوين في حد ذاتوا يكون قاسم مشترك بين مجموعة من عباد باش تعمل جمعية؛ او من الناحية القانونية هل ممكن انوا الجمعية تضم ناس انونيم ولا هذوكم موش داخلين؟؟؟؟؟ او كان باش نتخالاو عليهم هاهو تولي الجمعية ما تمثل كان كعبات يتعدوا على الصوابع؟؟ او زيد انا شخصيا نعتقد انو اهم حاجة تميز مجال التدوين هو انوا مجال حر ما ايقيدو حتى شيء لا جمعية ولا قوانين نظام داخلي؛او زيد انا مانيش فاهم شنوة ممكن تقدم هل الجمعية لي انا بصفتي مدون؟؟ كي يحجبولي مدونتي مثلا كيما صار قبل و كيما صار مع برشة اوخيان؛ شنوة باش تعملنا هل الجمعية؟؟ باش تعطيني تعويض ههههه؟؟ ولا باش تصدر بيان احتجاج و تنديد؟؟؟ ولا زعمة باش ايولي عندنا ممثل قانوني ايدافع علينا؟؟ انا نتصور حتى الحالات هذي او مع الظروف الراهنة او التضييق على العمل الجمعياتي في بلادنا العزيزة فانوا هل الجمعية موش باش تعاونا على انا نحلوا مشاكلنا ؛ بالعكس باش تزيد اتضيق علينا بما انوا عمار او اصحابوا باش تولي عندهم جهة واضحة او ظاهرة ايوجهولها الدبوس متاعهم؛ اما توة هاهي البيعة مفرقة او داخلة بعضها كان طارت ايقص مدونة ولا زوز تعاود تتطلعو بادريسة اخرى؛ اما مع الجمعية باش تولي الادريسة واضحة او ساهل عليه ممارسة الضغط عليها؛ كان موش ممارسة حاجات اخرى؛ لذى انا نرى انو يبقى الوضع على ما عليه خير خاصة انو برهننا انو وسط هل الفوضى هذه الكل انجموا نتظموا او نعملوا حاجات مع بعضنا كيما ايام التدوينة البيضاء او غيرها؛ آخي ما سمعتوش بالفوضى الخلاقة هههه؟؟؟ هذي هي؟؟ انا خايف كان تكبر في روس الجماعة حكاية الجمعية هذي او ايخوضوها بالعياط او الحس او ايولي عمار يدورهالم حكاية انتماء؛ او تولي عاد مسكين فلان شدوه ؛ شبيه خوانجي؟؟ لا تدوينجي معنها مدون منتمي؛ ما تستغربوا شيء في هالبلاد راهو عادي ماتضحكوش؛ لذا انا نرى انو قوة المدونين هو انهم في الفرتيال او مفرقين صعيب تنجم تضربهم؛ على خاطر الناس الكل مدونين؛ او انا نتمنى انو ظاهرة التدوين تنتشر أكثر او تولي الناس الكل تكتب؛ الناس الكل تعبر؛ برا وقتها آش كون باش تشد؛ اما كي تعمللهم جمعية تحصرهم؛ هذا اذا كان نجحت الفكرة اصلا؛ لانو كيما قلت المبدأ هو انو الناس الكل اتدون؛ ما يغركمشي العدد اللي مازال ضعيف توة؛ او توة بالله مدون عمرو 7 سنين باش تحطو ما استاذ جامعي في نفس الجمعية؛ او زيد شنوة اللي يلزمني انا بقرارات او افكار الجمعية كان ما عجبتنيش؟؟ ولا باش ايولي كل واحد يعمل على زي راسو او هكاكة تولي الجمعية صورية او ما عندها حتى معنى؛ لذا نقوللكم سيب علينا من هل الحكاية لا يولوا ايقولونا كيما كان جمهور المكشخة ايقول قبل "اعملوا جمعية...او امشوا العبوا في دحدح

هذيكا بلادي .....تونونيمس

كانك علماني انت فاسد او كان ما ردوكش كافر؛ كان تصلي تولي خوانجي او كان ماراصتلكشي في الفينقة؛ كانك خدام يكرهوك؛ شبيك آخي تخدم في رزق بوك؟؟ كانك كركار؛ آه مهف يعمل ضربتين او ايجي في قعر الحانوت؛ مرتاح او مريحنا؛ كانك تبزنس نسواني او مخك فارغ؛ كانك مستكفي بروحك معقد او ماكش نرمال؛ ؛ كان قريت على روحك ايصبولك الماء في ركايبك؛ خريت فيه بالقراية؟ هات آش عندك؟؟ آش تسوى؟؟ كان ماقريتش بهيم مستك طالع لبوك ولا لامك؛ كان قرّيت تولي جرد استاذ؛ كان ماقريتش تضرب البطالة حتى لن ادورها سرقة او براكاجات في لخر ايدخلوك الحبس؛ كان هجيت تولي من جماعة شي نو يغزرولك على جنب؛ كان قعدت يحقروك على خاطرك من وراء البلايك؛ كان كذبت ايصفقولك؛ كان قلت الحق ايصرفقوك؛ عاد العالم هذا الكل جاووه جماعة توة او شمروا على ايديهم او حبوا يكتبوا؛ او كتبوا؛ او زادوا كتبوا؛ اوزادوا كتبوا؛ مساكن ما يعرفوش اللي ممنوع الكتابة في بلادي ها الدونيييين؛ علاش تكتبوا؟؟؟ العلم الكل عندنا او موجود في زوز كتب؛ كتاب موجود في كل دار؛ او كتاب مكتوب على كل دار؛ لذا ماتتفجعوش او ما تتقلقوش لا من انونيم ولا غيرو؛ على خاطر هاكم شفتو؛ البلاد كلها انونيم؛ تونونيمس

الى السيد وزير الصحة؛ الكنام تسرقني

سيدي الوزير؛
لقد قمت كأيها الناس بالتسجيل في الكنام منذ اشهر؛ ولقد اخترت منظومة القطاع الخاص؛ فما راعني الا انه تم الحاقي "عنوة" بمنظومة القطاع العام؛ و لكن وبما انني كنت متابعا لفوضى الكنام في الصحافة المكتوبة و الالكترونية؛ لم افاجأ بالأمر وقصدت اليوم ادارة الكنام بولاية نابل من اجل تصحيح الامور؛ لكن المسؤول هناك رفض و طلب مني الرجوع في سبتمبر القادم؟؟؟؟؟؟ مما يعني ان الكنام سيأخذ مني مالي عنوة و بدون حق الى موفى شهر سبتمبر القادم؟؟؟؟ ماذا يسمي القانون التونسي اخذ مال الناس عنوة و بدون رضاهم؟؟؟ لماذا يجب عليّ دفع مال من اجل شيء لا اريد الاشتراك فيه؟؟؟؛ هل هذه هي دولة القانون و المِؤسسات؟؟؟؟ ثم اي قانون هذاالذي لا يسمح لزوجتي بالتمتع بنفس النظام الذي يتمتع به زوجها فقط لانها طالبة؟؟؟ طالبت من الموظف هناك مدي برد كتابي؛ فما كان منه الا اخبرني انه بامكاني احضار عدل منفذ ليشهد على كلامه؟؟؟ لن اقوم سيدي الوزير باحضار عدل منفذ و لكني سأقوم بارسال بريد الكتروني؛ تكون الادارة مطالبة بالرد عليه في 48 ساعة كما تنص عليه المعلقات في بهو كل الادارات التونسية؛ و في حالة عدم الاستجابة لطلبي فاني سألجأ الى القضاء من اجل استرداد حقوقي؛ اتمنى ان ان يصلك نصي هذا لتعرف بعض ما يجري في وزارتك و حتى يتمكن سيادتكم من اخذ التدابير اللازمة من اجل اصلاح الوضع.
آدم الصالحي
مواطن تونسي

تلفون من شباب العالم

بربي كي ما تعرفوش تكتبوا علاش الفضايح مع شباب العالم؛ هكة توة؟؟؟ ماهو على الاقل كلموهم بالتلفون ولا بالشات كي انتوما مازلتوا ما تعرفوش حتى تحطوا نقطة كي تكمل الجملة؛ صحيح احنا عندنا الماء مسيب على البطيخ اواو كل شيء محلول على بعضو؛ لا تحكم فينا لا نقطة لا نظام؛ ما عدا نقاط التفتيش و قواة النظام؛ اما مانا تفاهمنا مع القورة نوري وجه السوق؛ توة يارسول الله ما نجمتوش تجيبوا واحد يعرف اللي في نهاية الجملة لازم نعملوا نقطة او معبدها نكتبوا جملة ثانية؛ او هكاكا ديما يمشي؛ لا قالك احنا شباب توة تونس منفتحين على كل شيء او كذلك الجمل متاعنا؛ مالا ياسيدي نعلمكم اللي وقع سوء فهم للرسالة متاعكم او الدنية خاضت؛عاد شباب العالم بعد ما بعث بجواب لبيغ تراب بوي كلمني في التلفون؛ صوتهم في حالة او داخلين بعضهم؛ قالولي شكون جعل هذا او معتزونه؛ الانتربول قاللهم ممكن يكونوا ارهابيين ناويين يعملوا عصابة كيما القاعدة سموها الميثاق اللي هو مبني على الشرع الاسلامي كيما جماعة القاعدة؛ او هاهي الجملة اللي خلاتهم يفهموا هكة

شاركنا في الحوار بكثافة وتبادلنا الراى بكل صراحة وشفافية شرعنا

قالك الجماعة ناوين يعملوا قاعدة جديدة ولا شنية الحكاية متاعت شفافية الشرع هذي. هيا قلتلهم لا ما تخافوش موش هكاكة الجملة. راهم نساو نقطة او هكة اصل الجملة

شاركنا في الحوار بكثافة وتبادلنا الراى بكل صراحة وشفافية(نقطة) شرعنا في صياغة ميثاقنا الشباب الوطني الذى نبرز فيه رؤيتنا لتونس والتزامنا من اجلها.؛

او زيد قالولي شكون جعل هذا؟؟
لقد فتح لنا الرئيس زين العابدين بن علي فرصا واسعة امام الشباب للحوار وللمشاركة جعل

قلتلهم ممكن يقصدو قناة جديدة كيما حنبعل؟؟ شكون يعرف
خلي عاد من الجملة هذي

ان مستقبل العالم بين ايدى الشباب . الاهداف الكبرى للامم المتحدة وتحديات العالم تحتاج الى يقظة الشباب والى حماسه

الجماعة ما فهموش آش مدخل حماس في الحكاية؛ قالولي آخي انتوما زادة عندكم اسرائيل؟؟؟ و الله ما عرفتش آش نقول؛ قلتلهم لا راهو الجماعة ايفدلكوا
او كل شيء لقيتلو تفسير كان معتزونه هذا ما عرفتوش شكون؟؟؟ قالولي شكونوا هذا؟ ارهابي؟ قايد جديد؟؟ عملت روحي ما سمعتوش؛ او هاكم اقروا بالله او نوروني كان تعرفوه

اننا معتزونه بموقعنا في الحياة العامة اننا متفائلون لمستقبل تونس

او زيد قالولي شنوة معناها موقعنا في الحياة العامة؛ قلتلهم معناها مع العامة في الشارع الشباب الكل حاط الحطة او شايخ؛ اما في الحياة الخاصة؛ في امورنا مع جيوبنا مع نسانا مع ارواحنا ...او بعد قلت هيا زايد توة نفسد فيها؛ خلينا في الحياة العامة
فيبالي سلكتها آخي زاد قلي بالله زيد فسرلي هذي رانا مافهمناهاش مليح

حتى يواصل الشباب اخذ مواقعه في الحياة العامة ويتحمل شرف القيادة في المسار الوطني

ماهو احنا في تونس نظمنا المؤتمر العالمي للمعلومات؛ او من حينها ولا كل شاب عندو موقع؛ عاد تولي تمشي مثلا في المغازة العامة؛ اللي هي جزء من الحياة العامة حتى يهبط عليك واحد ايقلك شد هاهوالموقع متاعك؛ او ياويلك كان خذيت موقع وحدك من غير ما يعطهولك المسهولين؛ لازمك تستنى مسهول يعطهولك باش تنجم تولي عندك موقع؛ او هذي حاجة بديهية او تابعة النظام؛ او اهوكة ساعات تزيد تعطي حويجة باش يعطوك موقع باهي؛ او وقت اللي يولي عندك موقع تولي عندك شرف المشاركة في السباق في المسار الوطني؛ او الجايزة متاع السباق هذا تفرق انت او المشاركة متاعك؛ ثمة اللي يصور خبزة؛ ثمة اللي صور ربع؛ او الأغلبية ايشاركوا من اجل المشاركة؛ او باش الجماعة اللي يجروا ياسر او ديما رابحين المسار الوطني ايحسوا بنشوة الربح كي يشوفوالخرين
ما هزوا شيء؛ هيا سيدي كيما تقولوا انتوما المنافسة الحرة
اننا ندعو شباب العالم الى تحمل دوره في تنمية الامم والاسهام في بناء مستقبل الانسانية الذى لا يكون الا مشتركا ومتضامنا

اما الجملة هذي سامحني راني مافهمتهاش؛ ما نعرفشي كيفاش مستقبل الانسانية لازموا يكون متضامن؛ والله الناس تكون متضامنة ممكن؛ اما هذا مستقبل متضامن؛ عمري ما سمعت؛ اللهم الا اذا كان مستقبل قابس باش يتضامن مع الستاد او يعملوا جمعية واحدة؛ او هذي ماتصير كان في الجنة؛ نشوفوكم فيها انشالله بجاه هل الشهر الفضيل
اما الفقرة هذي ما سألنيش عليها فسرتهالو وحدي على خاطر عرفتها صعيبة على مخو

اننا مقتنعون ان للشباب دور كبير في رفع هذا التحدى فوعي الشباب بخطورة هذا التحدى واستخدام قدراته على افضل وجه يساعد الانسانية على تجنب الانعكاسات الخطيرة للتدهور البيئي

ياسيدي لهنا ايحبوا ايقولونا ما عادش تبولوا على الحيوط راهو موش باهي للبيئة؛ هذيكة هيا لحكاية
اما بالنسبة للتكرار الزايد او ركاكة الاسلوب؛ ماتلوموش رانا صايمين؛ هيا شاهية طيبة