الخميس، نوفمبر 26، 2009

الاعلام العربي؛ بعد التهريج المصري هاهو التخبيز التونسي


من مدة او انا نتفرج على التهريج المصري في القنوات الخاصة او انا نقول في خاطري هيا الحمد الله اللي احنا ماعندناش اعلام جملة؛ اول مرة نحس في حياتي اللي هذي حاجة "بوسيتيف"؛ هيا ليلة عيد قلت هيا يعمل الواحد طلة على قنواتنا الوطنية؛ ماني نذكرهم من العيد للعيد؛ ماهو عادتي ديما نمشي نزور في العيد او نقرا الفاتحة ؛ هيا حليت حنبعل تفاجأت نلقى صحيب قديم او زميل في الدراسة خويا سمير؛ قلت هيا برة نشوفوه او نتفرجوا عليه آش باش يقول؛ مانعرفشي علاش ديما نفرح كي نشوف واحد من الشباب اللي نعرفهم في التلفزة؛ نقول هيا باهي هاهو الشباب لاقي فرصتو على الأقل؛ نلقى مذشطة مزيانة او هذي حاجة غريبة في التلفزة متاعنا؛ قلت هيا برا نتفرجوا؛ نلقى الموضوع هو الجن؛ اي نعم ياسيدي الجن او "الطبة" اللي يداوا بالقرآن او هات من هاك اللاوي؛ موضوع يظهرلي ماعندو حتى دخل بسهرية العيد؛ مانيش فاهم انا المسهول على البرمجة آش يقصد بالضبط؛ باهي هذا الكل في واد؛ او انك تجيب انسانة مريضة او تصورها او هي في حالات مرضية من المفروض ما تتصورش لانها حاجات خاصة ياسر او تصويرها يحط من قيمة العبد او الاحترام اللي يلزم يلاقيه اي مريض؛ استغلال بساطة الأب او الأم او رغبتهم في ايجاد حل لمرض ابنتهم؛ باش تجيبها المسكينة للاستوديو او تزيد تتصرع غادي المسكينة او هوما ايصوروا او يستناوا فيها؛ او ولات فيلم او سبكتاكل؛ او مبعد في عوض باش يروحوا بيها؛ رجعوها باش تزيد المنشطة-او موش الصحفية؛ حاشاها الصحافة- تقوم باستجوابها او التحقيق معاها المسكينة؛ يسألوا فيها عن الجن او آش حست او آش يقولولها او خرّف يااللي تخرّف؛ في حين انوا كان من المفروض انو يهزوها تروّح ترتاح ولا يهزوها للمستشفى؛ البرنامج كامل ماشي في اتجاه الشعوذة او الجن في عوض انوا كان من المفروض انو الصحافة تساهم في محاربة المظاهر هذي؛ المنشطة واخذة موقف محايد؛ طبعا هذا يظهر في الأول انوا موقف احترافي لانوا دورها ادارة الحوار بدون الانحياز الى طرف؛ لكن هذاكا كي يولي برنامج سياسي موش برنامج على الجن ههههه. هيا قلت برة سيّب علينا من حنبعل او نشوفو قناة 7؛ نلقى ياسيدي خرافة أخرى؛ جايبين شبعة محامين طايحين في قرار متاع مجلس تربية في معهد؛ أي ياسيدي؛ ماهو ولاّ من مشمولات المحامين التدخل او الترافع في مجالس التربية في المعاهد؛ هذي خدمة جديدة باش ينقصوا بيها البطالة متاع خريجيّ الحقوق؛ او باش يولي كل تلميذ عندوا المحامي متاعوا؛ بالحرام لاعاد فاهم شيء أنا في هالبلاد؟؟؟ هيا سيدي بعد ما طاحوا في المجلس او المدير؛ كلموا المدير الجهوي آخي صب عليهم سطل ماء بارد او قاللهم رانا قلنالوا سي الشباب أرجع أقرى يرحم بوك ما صار شيء؛ او رانا بعثنالوا زوز برقيات؛ اي نعم زوز برقيات؛ معناها الجماعة عاملين شوهة او طاولة او كراسي او شارين الشبوك من غير ما يكلفوا أمرهم باش يتحروا حتى في الأمر؛ جوست باش يعملونا سبكتاكل او ايعدولونا شوية اشهار في الفاصل باش ايصوروا شوية فلوس؛ قال شنوة الحق معاك؛ آخي الحق طلع موش معاهم او طلع مع الادارة الجهوية للتعليم كيما تفضل المدير الجهوي او يعطيه الصحة في الكلمة اللي قالها في لخر؛ أنا الحق معايا؛ وقتها لقاو رواحهم في مشكلة كبيرة؛ مابطاوش او صنعوا مشكلة أخرى او هي اناهي السنة اللي باش يرجعلها التلميذ؛ اللي هي في الواقع موش مشكلة؛ او لكن لازمها مطلب من نوع آخر غير اللي تقدم بيه وليّ التلميذ باش يستأنف قرار مجلس التربية؛ او هذاكا اللي صار؛ هيا الحاصيلو سهرية تخبيز في تخبيز مع تلفزة أقل مايقال فيها انها ماضحييش؛ على خاطرها جيفة؛ هيا عيدكم مبروك

هناك 4 تعليقات:

guyguoz يقول...

سامحني يا خويا آدم أما انت زادة الله يهديك عملت كيف هاك الخرافة متاع "يا شاري الهم بالدقيق "ياخي ماتعرفشي الى قناواتنا محترفين الدرويش عاد كيف ما وصلتلهم حضارة الهشك بشّك و تلفزيون الواقع ولاّو يدّروشو على نغمة حكايا الشعب .واختيار حنبعل للتوقيت محسوب على خاطر يحبو يجبدو أكثر مشاهدة يا خي كان في سيدي رمضان المزود عامل مسد تحبهم يجيبولنا الرسالة يوم عرفة الله يجيرنا من العقول الهابطة وكل عام وانت بألف خير

Chiheb 12 يقول...

أوّلا وقبل كلّ شيّ عيدك مبروك وسنين دايمة خويا آدم ،جميعنا نرثي لحال اعلامنا كان مقروء ولاّ مئي ولاّ مسموع ،ماعندك في الهمّ ماتختار،لولا رحمة ربّي من الباربول وشويّة من الانترنت ، رانا حتّى حني نبعبعوا لنّا ياسر ...

ابوناظم المرزوقي يقول...

عيدك مبروك ...ماهو يقولو بالتونسي خانتها ذراعها قالوا مسحورة ..ايه عاد المناسبة تفرض باش نستحضروا السحر والجان ..والناس صابحة تصبغ في اصباعها بالدم ...ياخي اش يفرق على قنوات الخليج اللي تعدي في افلام الغزو الاسلامي للعالم والفتاوى التي تحرم في الدنيا الكل و..و...ولا واحد جبد على اش صاير في بلدان اخرى عربية واسلامية قاعدة تتهرس بايدي اسلامية ؟؟؟؟

Big Trap Boy يقول...

كانت تشخر زادت جن

:)