الثلاثاء، جويلية 17، 2007

كيفاش تكون راجل


الرجولية؛ فلان راجل ياسر؛ او فلان ماهوشي راجل؛ لا او يقولوا زادا فلانة رجالة ما ثماش كيفها؛ او في العلاقات بين الراجل او الرجالة-مؤنث- باش تكون راجل لازمك تكون صيد كلمتك ما ترجعشي لتالي؛ لازم المرا ما تسمع منك كان كلمة اعمل؛ هات؛ امشي…الخ؛ معناها تسمع الاوامر او تسكر فمها؛ مالا باش راجل انت؛ هي الرجولية لعبة؛ لازمك تكون اشنب شناباتك واقفة؛ كان معندكش ركب شلاغم اصطناعية؛ خير ملي الرجولية متاعك تكون ناقصة؛ من علامات الرجولية ياسيدي انك لازمك تكون مغيار على مرتك؛ مالا كيفاش؛ لازمك ما تخلي حد يكلمها ولا يجي على حالها؛ اما كان كلمت هي واحد عاد؛ هوني عاد سامحني فيك؛ ماكشي راجل؛ اكبس تلقى ما تحل؛ مالازمها تكلم حتى راجل غيرك؛ لازمها تعرف اللي ثمة راجل واحد في الدنيا؛ هو لشنب بو…؛ اللي هو انت طبعا؛ حوايجها لازم يكونوا مخيطين عند الخياطة؛ موش نساء توة تلقاها لابسة مريول ولا ملابس داخلية فيهم اسم راجل آخر او زيد يهود ما همشي حتى مسلمين كيما لاكوست او بوقار او غيرهم ياسر؛ يا سيدي كانها عل الاسامي خوذ ستيلو او اكتبلها اسمك عل المريول او زيد صحح فيه باش يولي سينيه؛ ماهم يموتوا عل حوايج السينيه؛ القضية لازم تقضيها انت موش لمرا ؛على خاطر الخضارة كلهم رجال او هذا ما يليقش بيك؛ تصور مرتك توقف تحكي او تضحك مع الخضار او تقولو اعطيني كيلو فقوس ولا بانان؛ ملا حشمة؛ والله يولي حلال ذبحها؛ انا مثلا حتى كي نمشي للخضار الفقوس نقصو تروف قبل ما نروح بيه؛ او البنان هزو عصير؛ ملا تلعب انت؛ انا عندي صاحبي طلب مرتو في التلفون في الليل ردوا عليه قالولو مخاطبكم خارج الخدمة؛ روح قتلها؛ مالا شنهي ؛ ما عندناش نساء تخدم في اليل. هيا برجولية توة لازمني نمشي قناة اقرأ بالسوري قريب تحل.
ما ذابي كان واحدة من الاوخيات المدونات يعملونا النسخة النسائية لهل الحكاية باش يوعيو النساء كيفاش تكون بنت عايلة.
مشكورين مسبقا

هناك 5 تعليقات:

PASSENGER يقول...

ne9sin a7na machékil ?! wallah fi tounes na7kiou 3arrjoulia ou si sayed ou 3antar ...7atta lin innsa mte3na wallew houma illi rekbin 3lina ...ya sidi 9allik tounes abbab hia mou7arriratou al mar2a ...fi tounes el mra ..timchi ou ta7ki ou tidh7ak ou tokhroj wa9t mat7ib ...béhi hakka ?! ...ma3net_ha ..imma irrjoulia kifma sawwarha inti (bittbi3a inti 3milt caricature) ...wa illa el mra ta3mil elli fi belha ..mahou el 7ichma zinet innsa ...wichahéma wil 39al ..tej irrajel ...la tafrit wa la ifrat...walla lé ?!

SNAWSI يقول...

ya Adam, ech toksod inti tawa? et7eb version au féminin ? et7eb " ganaza we nechba3 fiha latem" kima yekoulou il msara?
En tt k, ena ktebt moddet enharin un post intitulé " les frustartions des mâles tunisiens", a3mel talla baba ;)

s يقول...

ta definition de la virilité ma jet chay...

adam يقول...

@ s
ما هيشي الديفينيتون متاعي هذيكا؛ هذيكا الدفينيتيون متاع الناس اللي تفهم الدنيا كان كيما تحب هي؛ اللي نسموهم احناالناس العاديين العباقرة؛ هيا انست بعقلك
:D

brastos يقول...

مفاهيم و تصنيفات سطحية و خاطئة..الراجل و المرا في نهاية الامر بشر قابل للخطأ كيما للصواب....و للضعف كيما للقوة..و للفشل كيما للنجاح..بالنسبة للحزرة و الغيرة..نتصور انها مسألة وضوح في العلاقة و صراحة و ثقة بالنفس و بالطرف الآخر.. و شفافية..شفافية حقيقية موش هاك اللي ديما يحكولنا عليها في النشرة الجهوية..