حوار بريء جدا

دار هذا الحوار بيني و بين أمل بنت الجيران و عمرها 5 سنوات

انا- ايجا بنتي هات بوسة؛ محلاها محلاها هل البنوتة؛ او محلاها هل المنقالة؛ آش كون شراهالك؟
أمل- بابا
انا- تراه انشوف؛ اوه هايلة هذي؛ تي هاهي مازالت بالوقت القديم؛ هات خلي انبدلها او نزيدها ساعة.
أمل تضحك- علاش تزيد فيها؛ آخي شبيها غالطة؟؟؟
انا- لابنتي ماهشي غالطة اما ماهم زادوا ساعة
أمل- علاش عمو زادو ساعة؟
انا قلت في خاطري والله هذا سؤال صعيب- باش يقتصدو في الضو بنتي.
امل تبدي علامات استغراب و كنت اعلم انها لم تفهم شيئا. او علاش عمو يقتصدوا في الضو؟
انا قلت برا عاد آش باش يسلكني توة- بنتي باش الدولة تربح برشة فلوس.
امل- صحة ليها؛ الدولة هذي عمو متاع شكون؟
انا و ليت توة آش يسلكني بركة- الدولة متاع الناس الكل بنتي. متاعنا الكل.
امل- معناه حتى انت عمو باش تربح فلوس.
انا- ايه بنتي انا او انتي او الناس الكل.
فرحت امل مسكينة و يظهرلي حست روحها ربحت برشة فلوس عاد قلت مانخليهاش هكاكة خرجت دينار او مديتهولها و قلتها- هيا بنتي هاهو بايك من الربح برة اشري بيه شكلاطة او شيّخ روحك عاد. او مشات فرحانة هذاكا حدها و أكيد راهي باش تقعد ترحم على الدولة حتى لن ينوب ربي او تولي تفهم.
عاشت تونس الجميلة حرة مستقلة