يا فرحتي بيك ياتونس

زعمة يكفي انك تنفيت. انك تعذبت. انك ضربك القناص بكرطوشة. انك عشت 20 عام متغرب باش تجي توة او تولي صاحب حق علي. اولازمني نسمع كلامك او نعيط اوراك اونمشي معاك في الثنية اللي تحبها. فقط على خاطرك تعذبت اوتنفيت....الخ تي اني منفي عمري كامل في تونس ما قلت شيء...

ولا على خاطرك عامل فيديو ولا زوز في الفايسبوك ايدوروا لازمك تولي بطل فوق من راسي. ولا على خاطرك قريت او طلعت الاول او انت احسن واحد في درا شنوة لازمني نصفقلك ولا نولي مانيش وطني او طحان

ولا سيادتك تصلي حاضر اوانا الحاضر الغايب في الهابلاد ما حاسني حد اوربي بعثك باش تنقذ البلاد

ولا على خاطرك عاملة غلاف على روحك اوالحاكم قبل كان ايفد من الغلاف او عمل فيكم اللي ما يتعملش معناها سيادتك توة باش تتنصب علي بطلة او لازمني نوقفلك احترام

اذا كان الحاكم ولا كيما تقولوا المخلوع كان ظالم او كان زادة ياسر كلب يهيج او يكثر من النباح كي ايشم ريحة الذيوبة.... مشى الكلب جاوني الذيوبة..... يافرحتي بيك ياتونس

كليمة للشعب التونسي

كليمة للشعب التونسي

http://www.envoyercefichier.com/files/wtUx1296056520.htmlكليمة للشعب التونسي

هذا ما فهمته من خطاب الريس

هذا مافهمته قبل خطاب الريس
أن الشعب سئم سياسة التهميش و الفساد
هذا ما فهمته من خطاب الريّس
أنه لا حرية بدون تضحيات و أنه لا شيء فوق ارادة الشعوب؛ والا مالذي جعل الخطاب يتحول من التصدي للعصابات بكل حزم الى "فهمتكم او راني فاهمكم"؛
مافهمته من خطاب الريّس
أن الفساد لا يمكن أن يدوم و أن طاقة الشعوب على التحمّل لها حدود؛ أرجو أن يكون هذا الدرس قد استوعب جيّدا
مافهمته بعد خطاب الريس
أن الاعلام الرسمي يأبى الا أن يستمر في الكذب الماسط؛ و عادت حليمة الى عادتها القديمة؛ كيف يمكن لتظاهرة عفوية أن تخرج حاملة لصور الرئيس و أعلام صغيرة لا نجدها الاّ في مقرّات الشعب؛ هل يعرف أحدكم عائلة تونسية واحدة تحتفظ بصور الريس في منازلها حتى تخرج بها في تظاهرات عفوية؟؟؟؟
ما لم و لن أفهمه من خطاب السيّد الوزير في قناة 7
أنه لم يستطع الخروج من منزله نظرا لوجود حظر التجوّل؛ بينما استطاع المواطنون الخروج للاحتفال؟؟؟؟
وبعد كل ما حدث يحرج علينا الوزير بسبق صحقي ليخبرنا أن القضاء مستقل قي تونس؟؟؟ ولا أستغرب أن يخرج علينا وزراء آخرين في الصحافة ليخبرونا أننا نعيش في عالم من الحرية و الرخاء الاقتصادي و نعود الى عزف الاسطوانة القديمة؛ لذا من الواضح أن التغيير لن يحصل بين ليلة وضحاها؛
و أخيرا رأيت في خطاب الريّس البارحة درسا تطبيقيا لعلوم السوسيولنقويستيك و الدراسات التي اهتمت بدور اللهجة العامية في الخطاب السياسي؛ وهو ما يدل على اعتماد الريّس الآن على أناس مثقفين عالمين بفنون وقواعد الخطاب السياسي على عكس الخطابات البوليسة التي كنا نسمعها سابقا؛ و أتمنى هنا أن لا يقتصر دور المثقفين على كتابة الخطابات بل يتعداه الى تسيير أمور الدولة

هذه المدونة لم تعد محجوبة في تونس

أخيرا فكّ الحجب عن هذه المدونة؛ وذلك بعد تضحيات الشهداء؛ رحمهم الله

كاريكا...مدوّنة جديدة

كاريكا مدونة جديدة للكاريكاتور الضاحك؛ نحاول نعلق فيها على أهم ما يصير في هالبلاد ولاّ بكل بساطة نعبر بيها على رأي في برشة مواضيع؛ بصفة عفوية او من غير برشة فلسفة؛ محاولة جديدة باش نبدل بيها الجو او نرجع للتدوين بنفس آخر او طريقة أخرى؛ تابعونا

الاعلام العربي؛ بعد التهريج المصري هاهو التخبيز التونسي

من مدة او انا نتفرج على التهريج المصري في القنوات الخاصة او انا نقول في خاطري هيا الحمد الله اللي احنا ماعندناش اعلام جملة؛ اول مرة نحس في حياتي اللي هذي حاجة "بوسيتيف"؛ هيا ليلة عيد قلت هيا يعمل الواحد طلة على قنواتنا الوطنية؛ ماني نذكرهم من العيد للعيد؛ ماهو عادتي ديما نمشي نزور في العيد او نقرا الفاتحة ؛ هيا حليت حنبعل تفاجأت نلقى صحيب قديم او زميل في الدراسة خويا سمير؛ قلت هيا برة نشوفوه او نتفرجوا عليه آش باش يقول؛ مانعرفشي علاش ديما نفرح كي نشوف واحد من الشباب اللي نعرفهم في التلفزة؛ نقول هيا باهي هاهو الشباب لاقي فرصتو على الأقل؛ نلقى مذشطة مزيانة او هذي حاجة غريبة في التلفزة متاعنا؛ قلت هيا برا نتفرجوا؛ نلقى الموضوع هو الجن؛ اي نعم ياسيدي الجن او "الطبة" اللي يداوا بالقرآن او هات من هاك اللاوي؛ موضوع يظهرلي ماعندو حتى دخل بسهرية العيد؛ مانيش فاهم انا المسهول على البرمجة آش يقصد بالضبط؛ باهي هذا الكل في واد؛ او انك تجيب انسانة مريضة او تصورها او هي في حالات مرضية من المفروض ما تتصورش لانها حاجات خاصة ياسر او تصويرها يحط من قيمة العبد او الاحترام اللي يلزم يلاقيه اي مريض؛ استغلال بساطة الأب او الأم او رغبتهم في ايجاد حل لمرض ابنتهم؛ باش تجيبها المسكينة للاستوديو او تزيد تتصرع غادي المسكينة او هوما ايصوروا او يستناوا فيها؛ او ولات فيلم او سبكتاكل؛ او مبعد في عوض باش يروحوا بيها؛ رجعوها باش تزيد المنشطة-او موش الصحفية؛ حاشاها الصحافة- تقوم باستجوابها او التحقيق معاها المسكينة؛ يسألوا فيها عن الجن او آش حست او آش يقولولها او خرّف يااللي تخرّف؛ في حين انوا كان من المفروض انو يهزوها تروّح ترتاح ولا يهزوها للمستشفى؛ البرنامج كامل ماشي في اتجاه الشعوذة او الجن في عوض انوا كان من المفروض انو الصحافة تساهم في محاربة المظاهر هذي؛ المنشطة واخذة موقف محايد؛ طبعا هذا يظهر في الأول انوا موقف احترافي لانوا دورها ادارة الحوار بدون الانحياز الى طرف؛ لكن هذاكا كي يولي برنامج سياسي موش برنامج على الجن ههههه. هيا قلت برة سيّب علينا من حنبعل او نشوفو قناة 7؛ نلقى ياسيدي خرافة أخرى؛ جايبين شبعة محامين طايحين في قرار متاع مجلس تربية في معهد؛ أي ياسيدي؛ ماهو ولاّ من مشمولات المحامين التدخل او الترافع في مجالس التربية في المعاهد؛ هذي خدمة جديدة باش ينقصوا بيها البطالة متاع خريجيّ الحقوق؛ او باش يولي كل تلميذ عندوا المحامي متاعوا؛ بالحرام لاعاد فاهم شيء أنا في هالبلاد؟؟؟ هيا سيدي بعد ما طاحوا في المجلس او المدير؛ كلموا المدير الجهوي آخي صب عليهم سطل ماء بارد او قاللهم رانا قلنالوا سي الشباب أرجع أقرى يرحم بوك ما صار شيء؛ او رانا بعثنالوا زوز برقيات؛ اي نعم زوز برقيات؛ معناها الجماعة عاملين شوهة او طاولة او كراسي او شارين الشبوك من غير ما يكلفوا أمرهم باش يتحروا حتى في الأمر؛ جوست باش يعملونا سبكتاكل او ايعدولونا شوية اشهار في الفاصل باش ايصوروا شوية فلوس؛ قال شنوة الحق معاك؛ آخي الحق طلع موش معاهم او طلع مع الادارة الجهوية للتعليم كيما تفضل المدير الجهوي او يعطيه الصحة في الكلمة اللي قالها في لخر؛ أنا الحق معايا؛ وقتها لقاو رواحهم في مشكلة كبيرة؛ مابطاوش او صنعوا مشكلة أخرى او هي اناهي السنة اللي باش يرجعلها التلميذ؛ اللي هي في الواقع موش مشكلة؛ او لكن لازمها مطلب من نوع آخر غير اللي تقدم بيه وليّ التلميذ باش يستأنف قرار مجلس التربية؛ او هذاكا اللي صار؛ هيا الحاصيلو سهرية تخبيز في تخبيز مع تلفزة أقل مايقال فيها انها ماضحييش؛ على خاطرها جيفة؛ هيا عيدكم مبروك